Nongpoh, Jylliew 01: Kum uwei na u rangbah uba la ju im ban kyrshan ïa ka ing ka sem da ka kam Misteri ban shna ing shna sem ne kiwei kiwei ki jingshna kiba u la pynlut por la bun phew snem mynta, hynrei naduh ka jingwan lynshop ka khlam COVID-19 ha ka jingkhang shnong bad duna ki kam ki jam u la phai noh pat sha ki kam shna kti da ka jingthmu ban pynim ïa ka ing ka sem lyngba kitei ki kam kiba u la pynlut por pat da ki kam shna kti.
Une u Rangbah uba la phai khmat pat mynta sha ka kam shna kti la tip kyrteng kum u Gilbil Syngkli na ka Shnong Umjarasi ha Ri Bhoi District bad haduh mynta u don ka kurim bad kynthup lai ngut ki khun kiba u la pynstad pynnang tang da ki kam bylla sngi jong u.
Kaei kaba la pynlong ïa u Bah Gilbil Syngkli ban phai khmat noh sha ka kam shna kti, ka dei hadien ba naduh u bnai Nohprah 2019 ba la sdang wan lynshop ka khlam COVID-19 ka la don ka jingktah ha ki kam ki jam kiba um ioh shuh ban bylla ban sngi bad kane ka la buh jingeh ïa u ban pyndap ïa ka ing ka sem, hynrei hapdeng ka jingpakhang shnong ka sorkar (Lock Down) ban ïada na ka khlam COVID-19 bad namar ba ym don kam shuh ban bylla ban sngi u la phai khmat noh sha ka kam shna kti da kaba u la shna ïa ki jaid mrad bapher bapher bad un sa die pat sha iew sha hat ban pynim jakpoh ïa ka ing ka sem.
Kumba la paw pyrthei lyngba kitei ki kam shna kti jong u Bah Gilbil Syngkli, une u rangbah u don shisha ka sap kyrpang ban shna ïa ki jaid mrad bapher bapher ban pynwan dur thik thik bad ka jinglah jongu ban ai ryngkat ki rong ki rup katkum ka jinglong jong ki mrad ka la ïarap ïa u ban ioh ioh lad ban kyrshan ïa ka ing ka sem da kaba u die pat sha ki briew tang ban im jakpoh ka ing ka sem.
Ha ka jinglap u Nongthoh Khubor, ha ka ingsah jong u Bah Gilbil Syngkli ki la don bunjaid ki mrad kiba u la shna pynwan dur tang da ka kti ba kynthup naduh u Khla, u Sing, u Hati, u Klew, kyndat, Rabit, skei, Kangaro bad kiwei kiwei ki mrad bad nalor kata ruh u shna ki jingtem tynrai kum ka duitara kaba u ju pynlut por ban rwai ban siaw ha ka por ba u don por bad thaid na ki kam ki jam kiba u trei.
Nalor kitei ki jingshna ne pynwan dur ïa ki mrad bapher bapher bad shan ruh ki jingtem tynrai, u Bah Gilbil Syngkli u la pyrshang ruh ban ri ngap ha ing bad pynlut ruh ïa ka por ha ka rep ka riang.
Haba ïa kren bad u Nongthoh Khubor, u Bah Gilbil Syngkli, u la ïathuh ba u la sdang ïa kitei ki kam shna jingshna (Handicraft) naduh ka por ba wan lynshop ka khlam COVID-19, ha kaba ha ka por ka jingkyrduh kam kyrduh jam u la shim ka rai ban phai noh sha ka kam shna kti, hynrei ka jingpynlut por jong u kam shym la sepei bad ha kaba khatduh da ka jingai sap kyrpang u Blei u la lah ban pynwan dur ban shna ïa ki mrad bapher bapher bad nangta un sa die pat sha ki briew tang ban pyndap ïa ki jingdonkam ka ing ka sem.
“Nga sngewthuh ruh ba ka kam lajong ka long kaba myntoi bha naduh ba nga la sdang ïa kane ka kam shna kti ha kaba wat lada ngam ioh jingmyntoi kiba bun, hynrei ha ka por wan ka jingkyrduh ka la ïarap shibun ïa ka ing ka sem” ong u Bah Gilbil Syngkli, bad bynrap ruh ngan ïaid bteng beit ïa kane ka kam namar ka jingangnud ka long ban ai nuksa ruh ïa kiwei ki khun samla ba kim dei ban sngewpoh haba trei ïa ki kam lajong bad lada ngi pynleit jingmut hi ïa ki kam lajong ngi long kynrad ha ka la ka jong ka kam” u la bynrap.
Haba kylli pat halor ki lad jingïarap kiba u la ioh na ka sorkar ne ki tnad sorkar kiba dei peit ïa kum kine ki jaid kam, u Bah Gilbil Syngkli, u la ong ba haduh mynta um pat ioh kano kano ka jingïarap la ka dei na ka tnad Handicraft ne na ka Industries bad na ka por sh aka por u la ju leit wad ïa ki lad jingïarap, hynrei kim pat shem la ïarap satia ïa u, ha kaba haduh mynta u hap hi ban kyrshan na lade ïa lade ban pynïaid ïa kane ka kam kaba u la im jakpoh tang da ki kam shna kti, u la bynrap.
Ha kawei ka bynta, u Bah Gilbil nalor ka kam kaba u la pynlut por ha kitei ki kam shna kti bad u don ruh ka sap ha ka kam rwai bad tem ïa kitei ki jingtem tynrai kiba u la shna hi da lade kaba u ju pynlut por ha ka por uba u lait por bad ba u la sangeh na kitei ki kam kiba u la trei.
