Shillong, Nailur 09: U MP jong ka Shillong sha Lok Sabha, u Dr. Ricky AJ Syngkon, mynta ka sngi u la leit jngoh ïa ka Skul JNV ha Mawphlang bad u la lap ba ka skul ka la shu pynlong Online Class ïa ki Khynnah naduh ba la jai ka jingïap shabat bor ding elektrik jong uwei u Khynnah Skul ha kane ka skul ha kine ki bnai baladep.
Lah ban kdew hangne ba uwei u Khynnah Skul uba kyrteng u Nathaniel Sohtun, uba shong Class XI, u la khlad na ka jingshah bat bording elektrik ha kane ka skul katba u dang sum.
Hadien kane, ha ka jingleit jurip kiba bun la lap ba kane ka skul ka long lyngkrang bha ka rukom tan bording elektrik, ha kaba ki khynnah skul ki la ïathuh ba ki don bun ki jingbymbiang, ha kaba ki don ki sainar bad ki wire kiba leak ka bording bad ki la suba ruh ba kane ka jingshah bat bording elektrik une u khynnah skul ka lah ban dei na kane ka daw.
Ha kane ka jingleit jngoh, u MP u la ïakynduh ïa ka Principal jong kane ka Skul bad kiwei pat ki nongpynïaid kiba la ïathuh ba la hap ban pynlong Online Class ïa ki Khynnah namar ba ka dang don ka jingmoramot ïa ka skul khamtam eh ïa ki lain wiring bad kiwei kiwei pat ki bynta jong ka skul.
Na ka liang u MP, u la leit jngoh ïa katei ka skul namar ba kadei kaba la bei tyngka da ka sorkar pdeng bad kum u MP u don ka jingkitklieh ïa ki Projek ba la pyntreikam da ka sorkar pdeng ha ka jylla. Ha kajuh ka por u la bthah ïa ka Principal ba kidei ban ai report sha u na ka por sha ka por ha kaba iadei bad ka jingmoramot bad ka jinglong jingman jong ka skul, khnang ba lada don ki jingeh un ïoh ban pynsngew sha ki bor jong ka sorkar pdeng ha Delhi.
