Shillong, Nailur 07: Ka Khun Hynñiewtrep National Awakening Movement (KHNAM) ka la pynpaw ïa ka jingpyrshah kaba jur halor ka jingkynnoh ba la thung ïa ka para jong u Myntri Rangbah ka jylla ka Agatha Sangma kaba dei ruh ka MP barim na Tura kum ka chairperson ka Meghalaya State Commission for Protection of Child Rights (MSCPCR).
“Ka Party ka pynpaw ïa ka jingpyrshah kaba jur halor ka jingleh jong ka seng saiñ pythei kaba don ha ka bor kaba la ïalam ruh ïa ka sorkar MDA,” ong u Working President ka KHNAM u Bah Thomas Passah ha ka kren ha ka sngi Saitjaiñ.
“Ka jingthung ïa ki Advisor, Chairman, Vice Chairman bad kiwei ka la pynsyrwa kai ïa ka pisa ki paidbah bad ha kaba bun ruh ki la pynpaw ïa ka jingsngewkhia bad jingbym sngewhun. Mynta da kane ka jingthung, imat ka long shai bad ka sorkar MDA ka la leh shilliang bad ïashah shilliang bad kane ka jingthung kam ka long tang ban pynthikna ba kane ka sorkar kan neh ha ka bor bad kane ka long kum ka kam baleh da ka bor,” u la ong.
Shuh shuh u Bah Passah u la ong, “Ngi sngewphylla ruh ban tip ba u James Sangma u dei u briew uba hakhmat ha kane ka jingshim rai ha kaba u la ai ruh da ka jingthoh jingtyrwa sha ka sorkar, mynta kumno ki paidbah ba bun kin don ban ong halor ka jingshim rai jong ka sorkar. Ngi tip ba kiwei ki seng saiñ pyrthei kiba don hapoh ka sorkar MDA kin ym pyrshah naba ki ruh ki ïoh ïa ka bhah ha ki kam political appointment.”
Da kaba ong ba katkum ka jingpynbna jong ka sorkar kaba tarik 10, Naitung, 2013 ka la kren da kaba shai ba, “Ka Chairperson ka dei ban long ka briew kaba paw khmat bad kaba la leh ki kam kiba paw na ka bynta ban kyntiew ïa ka bha ka miat ki khynnah”, ong u Bah Passah da kaba bynrap, “Ngim ïohi ba ka Agatha Sangma ka long kaba bit ban shah thung na ka bynta kane ka kam. Ngi sngew ruh kumjuh ba kum kane ka jingthung kan pyndkoh ïa ka bha ka miat ki khynnah ha ka jylla.”
