Shillong, Nailur 07 : Ki paid riewngeit ka Balang Presbyterian Nongkseh da ka jingphuh mat ki la ïoh ban sakhi ïa ka jingplie paidbah ïa ka lynti ïaid kali ban leit sha ka jaka jong ka Balang ha Nongkseh Rim, Myrshan kaba la shna lyngba ka skim SRWP jong u snem 2021-2022
Kane ka skim kadei kaba la pynïoh da u MLA ha kato ka por, Bah Hamlet Dohling ha ka jingmang pisa ba 23 lak tyngka kaba kynthup naduh ka jingshna ïa ka surok ïaid kali, ka muri um bad ruh ka kynroh.
Haba kren ha kane ka sngi, u Bah Hamlet ba dei ruh u Chief Adviser jong u Myntri Rangbah u la ong ba u sngewkmen haduh katta katta ba u ïohlad ban don bynta lang bad ka Balang naduh ba u dang long kum u MLA bad ruh haduh kine ki sngi.
“Nga sngewkmen ka mynsiem naba tang mynta ka taiew nga la ïoh ban plie haduh ar tylli ki projek kiba dei jong ka Balang, kata kawei na bynta ban shna ïa ka surok na Mawsyiem Umlyngka sha Mawdumdum ter ter sha Nongkseh ban pynkhreh na bynta ka Synod ka ban long ha u Lber 2025 bad kawei mynta ka sngi ban plie ïa ka lynti ïaid kali kumjuh ka kynroh jong ka Balang hangne ha Nongkseh,” u la ong haba kren ha katei ka jingïalang.
Shuh shuh u la ïathuh ba wat hadien ba u la shah rem noh ha ka elekshon hynrei ka mynsiem jong u ban trei kam ailad satia bad dei na kane ka daw u ngeit ba u Blei ruh u plie ka lad da kaba ailad ba un don ha ka sorkar khnang ba un lah ban noh synniang kham bha shuh shuh.
Na ka liang u Tymmen Basan AH Nongbet, Tbn I Kharbyngar kumjuh u Tbn R Thangkhiew ki la pynpaw ka jingsngewnguh kaba khraw ïa u Bah Hamlet uba la long ka kti kadiang ka kti kamon ban kyrshan ïa ka Balang.
Ki la ïathuh ruh ba dei lyngba ka jingïarap jong u Bah Hamlet ba ki la ïoh ïa katei ka skiem ba 23lak tam ba ki la ïoh ban shna ïa katei ka surok, kumjuh ka kynroh ha jaka jong ka Balang kaba don hangtei ha Nongksehri, Myrshan.
Shwa kane la ïoh ruh ka jingpule ïa ka Ktien jong u Blei bad ka jingduwai na u Rangbah Balang, Bah S Khasybtiew
La donlang ruh ha kane ka sngi naduh ki nongïalam shnong ka Nongkseh, kata naduh u Rangbah Shnong, Secretary Shnong ki nongïalam Balang bad ki paidriewngeit.
