Shillong, Nailur 06: Ka Meghalaya State Pollution Control Board (MSPCB) ka la pulom ban pynneh ne pynlong ïa ka inventory ka e-waste generation kumba la donkam da ka E-Waste (Management) Rules 2016, kaba la lam sha ka jingduna ka jingkheiñ haba nujor bad ka e-waste collection da ki Producer Responsibility Organizations (PROs).
Katkum ka Schedule-IV ka E-Waste (Management) Rules 2016, kadei ka kamram jong ka State Pollution Control Boards ban pynkhreh bad ban sumar ïa ka inventory ka e-waste.
Watla ka MSPCB ka buh ïa ka thup ki generator ha ka jylla, ka khlem leh kano kano ka inventory jong ka e-waste generation da kine ki nongpyndonkam. Halor kane, ïa ka audit ym shym la lah ban ïanujor ïa ka e-waste generation bad ka jinglum ïa ki nuit ba la leh da ki PRO, ong ka kaiphod CAG halor ka solid waste management ha ki thaiï sor ka Meghalaya haba kut ka 31 tarik u Lber, 2022.
Ka kaiphod ka ong ha kaba ar, la lap ba bun ki tnat ka sorkar pdeng bad sorkar jylla bad ki tnat pla tyngka kum ka ophis Principal Accountant General (Audit) bad (Accounts & Entitlement), Fisheries department bad Reserve Bank of India, ki jaka pule kum ka Shillong Law College, Institute of Hotel Management, bad ki jaka shipai kum ka Director General, Assam Rifles ki khlem shah kynthup ha ka thup jong ki bulk generator ki e-waste ba la pynkhreh da ka MSPCB.
Shuh shuh ïa ka thup khlem da la pynthymmai manla ka por ban kynthup ha baroh ki bulk generator.
Na ka liang Member Secretary, MSPCB la ong ba kane ka kam ban pynkhreh ïa ka inventory ka e-waste generation la aiti sha ka Indian Institute of Waste Management, Bengaluru hynrei ïa ka kaiphod dang hap ban pyndep.
Kane ka jubab kam long kaba biang naba ka MSPCB ka khlem bud bad ki kyndon jong ka E-Waste (Management) Rules, 2016 wat hadien ba ka la kut la 7 snem naduh ka tarik ba la pynbna ïa ki kyndon, ka la ong.
Shuh, CAG kumjuh ka la ong ba ha Meghalaya, ki la don 3 tylli ki registered producer responsibility organizations (PROs) kiba don ha Shillong kiba dei ban kitkhlieh ban lum ki ñuit da ka e-waste, hynrei ka la don ka jingduna ki collection vehicle, ki jingduna ki storage facility bad buh ki jingïapher ia ki ñuit bad ka jingduna ka jingpynsngewthuh, kaba la pyndkoh ïa ki jingtreikam kiba biang halor ka e-waste management katkum ka E-Waste Rules, 2016.
Ki kyrteng ki registered PRO/collection centre ha ka kyrteng ki registered PRO kidei ka M/s KAro Sambhav, M/s RLG Reverse Logistics India Pvt Ltd bad M/s JS Enterprise (authorized collector on behalf of PRO Hulladek Recycling).
“Ym don kawei ruh ka PRO kaba don la ka jong ka kali ban lum ñuit bad ban kit ïa ki bad ki la shu shim wai ïa ki kali ha ka por ba ki leit ban lum ñuit. Kumta ka la long kaba eh ban leit lum ban kit ïa kiba bun jait ki ñuit ba la pynïapher hapoh ka e-waste kumba la bthah ha ka Schedule-I jong ka E-Waste Rules, 2016,” ong ka kaiphod da kaba bynrap ba ka jaka buh jong baroh ki PRO kim shym la don ki jingpynmynta lane ki jaka ban lum ïa kiba bun jait ki ñuit jong ka e-waste kumba la kdew ha ka Schedule-I jong ka E-Waste Rules, 2016.
Ka la ong ba ka M/s RLG Reverse Logistics India bad ka M/s JS Enterprise ki la pyntip ba na ka daw ka jingbym mon ki paidbah bad kumjuh ki seng ban thep ïa ki e-waste lyngba ki jaka lum bad ka jingduna ki jingai jinghikai ka la long ka jingïaleh kaba eh ba la mad da ka collection centre.
