Ha kine ki khyndiat snem ba la dep ka la mih ka jingïakren ba ka jylla ka la donkam kyrkieh ban pynkhlaiñ ïa la ka rympei khnang ban lah tehlakam ïa baroh ki kam bymman ne ki kam sniew kiba lah ban mih na la ïing, na la ki shnong ki thaw ne lah ban ong na ki kampohïing. Hynrei hapdeng kitei baroh, kita ki kam bymman i kumba ki nang ïohbor pynban katba nang ïaid ka por da ka jingnang roi ki nongdih bad nongkhaïi drok kumjuh ha ki kam tuh kam thiem. Balei kine ki mih, nangno ki mih bad kumno ki ïohlad ban rung syndon ha ki tyngkong iing jongngi.
Ha ki por hyndai la ju ïohsngew ba ki longiing Khasi ki ju kmen bha lada don bun ki khun kampher la kidei ki khun kynthei ne shynrang namar kine baroh tang shwa ban kem dum ki la don ha iing. Hynrei ha kane ka juk ba mynta, ka juk ba ki briew ki don tang khyndiat ngut ki khun bunsien ka ju jia (ym baroh) ki kmie ki kpa ki hap ban shong hi tang baroh arngut naba ki khun ki la bunkam bad ki paralok bad katba kin da poi iing la dei ka por sa tang ban shu thiah beit. Balei kum kine ki jingjia ki mih, hato dei ba ki kmie ki kpa kim don bor shuh ïa la ki khun ki kti ban teh lakam ne dei ba la ïaid kata ka juk k kor ki bor ha kaba ki khun ki la shah teh shah khum ha kita ki shangkhawiah social media. Kane ka jinglong jingman ka long kaba isyier haduh katta katta bad kaba pynpar ñiangkhriat ïa kiba bun balang ba kane kam slem ba kan poi ha man la ki tyngkong iing ruh.
Ka jingjur palat ka jingkyrni bad ka jingshah khring ha ki bor ka social media ka la poi haduh u pud ba ym long shuh wat tang ban pyllait ïa ka mobile na kti ha ka por bamja ruh. Kaba kham i shyrkhei ka long ba ki khun kim don por shuh wat ban ïa shongkai ïathuh khana ne ïa rkhie ïa kmen shi iing shi snem naba wat i khunlung iba rit i la shah tan ha ki bor kynsha aiu re ba don ha ka mobile. La ju ïohi ba wat i khunlung ba dang rit ruh im treh ban bamja lada ym don ka mobile hajan kaba pyni ïa ki dur boit ne ki jingïalehkai ba ki sngewtynnad.
Haba ngi phai pat sha ki khubor kiba ju pyllait ha ki youtube channel ne ki TV ngim ju ïohsngew shuh ïa kita ki sur kiba ai mynsiem ne kaba kren shaphang ka shongsuk shongsaiñ ne shaphang ka bha ka miat ha ka imlang ka sahlang, hynrei la ïohsngew sa tang ki kam leh donbor, ki kam thombor bad ki kam sniew kiba harukom khamtam eh tuh ka lute, ka pynïap briew bad kiwei kiwei ki khubor ba shyrkhei. Ka jingkylli ka mih hangne, hato, man la uwei pa uwei ba la kot ka bor sngewthuh ne ki bor pyrkhat, ngi la ju puson mo ba balei ki mih kine ki kam sniew kiba ha rukom ha ka imlang ka sahlang kaba la pyntad dor ïa ka hok Longbriew Manbriew bad haduh ka akor ka burom kaba la hiar dor arsut kaba la ïohi ba i kumba Aiñ Blei ne ka Aiñ Briew kam don shuh.
Khyndiat pat lah ban ong hangne ba man la uwei-pa uwei u la dei ban puson ïalade shimet halor ka jingkynrei kine ki kam sniew kiba la ktah shisha ïa ka shongsuk shongsaiñ ha ka imlang ka sahlang jong ka jylla. Ym lah ruh ban len bunsien haba ïohi ïa ki kam sniew la ka long ha ki Kot Khubor ne ki kor Telivision la ïoh sngew tang kata ka jingkren ïa kynthoh parabriew bad ka jingkhñium kaba mih na ka shyntur kaba ki da sngewpangnud ba kynrei ki kam sniew. Tangba, kumban bynrap biang, katno ngut kiba ju puson ne pyrkhat naei ka tynrai jong ka jingsniew ka wan bad balei ba ka jur ki kam sniew ha kine ki sngi. Sngew Sangsot ba ki briew ha kine ki sngi la ka long naduh ki khynnah, ki samla bad haduh ki tymmen ki san tang namar ka spah pyrthei bad ba ki ïabeh ïa kata ka Rongphong Pyrthei bad kim don por shuh ban puson ne ban pyrkhat halor ki tynrai ba ka jingsniew ka sdang ban mih. Hynrei ki la shuh ïa beh ïa kata ka spah pyrthei bad ki klet noh ban puson ne ban bishar ïa ka tynrai ba ka jingsniew ka mih kaba la ktah shisha ïa ka shongsuk shongsaiñ ha ka imlang ka sahlang ha ka jylla bad ka ri.
Ka Jylla Meghalaya ka dei ka jylla kaba bun tam ki Khristan phewse! da khongpong ha kine ki sngi ka jingsniew ka la shong kulai ha man la uwei-pa uwei u briew kiba la klet noh ïa la ka jong ka tynrai kiba la pyrshang ban beh ïa ka rongphong bad ki jingkwah bor bad burom kaba la pyntroin shisha ïa ka hok longbriew manbriew. Ngi lah ban kren shai sha ka pyrthei, dei tang namar ba ki kmie ki kpa ne ki Longkñi Longkpa ha kine ki sngi kim don por shuh ban sneng ne kyntu ïa la ki khun ki pyrsa ha la ïing la sem bad ki khun ki kti ki la im laitlan katba ki mon ha kaba ki la sdang ban leh na i kam sniew i barit bad kan sa pur pat haduh ba ki jingsniew ki la kiew skong ha kine ki sngi.
