Shillong, Nailur 04 : U Myntri Rangbah ka jylla Meghalaya, Conrad K Sangma u la pynskhem ba ka thong jong ka sorkar jylla ban kyntiew ïa ka ïoh ka kot sha ka 10 billion dollar, kadei kaba lah ban long bad kaba lah ban urlong.
Haba kren bad ki lad pathai khubor, u Myntri Rangbah u la ïathuh ba u la ïakren ruh ïa kane bad u Myntri ka tnad Platyngka jong ka Sorkar Pdeng halor ki mat kiba la kdew da ka kaiphod u Comptroller and Auditor General (CAG) ha ka kaiphod ba dang shen jong ki halor ka rukom pynïaid pisa ha ka jylla.
Shuh shuh u Conrad u la pynshai ruh ba ka kaiphod CAG ka la kdew ba ka mang pisa hapoh ka ‘Special Capital Assistance sha ki jylla kum ka ‘Capital Invesment’ ba ki dei shi bynta ka ram jong ka jylla. Kumta u la ong ba kum kine kim dei ban kynthup ha ka ram jong ka jylla lane ka jingduna pisa.
“U AG (Accountant General) um shym la bakla ha ka jingbishar jong ki; ka long tang ba kane ka jingkhein kam dei ban shah kynthup ha ka ram jong ngi ne ka jingduna pisa. Hynrei la bthah ïa u AG ban pynïa bynta ïa ka ha kane ka rukom. Ngi la rah ïa kane ka mat ha ka Sorkar India. Ha ka jingshisha, tang hynnin ka sngi, ka la don ka jingïalang bad ka Finance Department bad na ka liang ka Ministry of Finance ka la shim khia ïa kane ka bynta. Ki la kyrpad ïa ngi ban ai da ki kynja jingthoh, kaba yn sa kren bad u AG ban pynthikna ba ha ki por ban wan, kum kine ki jingkheiñ kin ym ktah ïa ka jingduna pisa ne ka ram jong ngi,” la bynrap shuh shuh u Conrad.
U Myntri Rangbah u la ïathuh ba u Secretary jong ka Finance Commission u Vijay Kumar u la ïa kren sani bha bad ka tnad pla tyngka, khamtam eh ha kaba ïadei bad ‘Special Assistance to States for Capital Expenditure scheme’.
“Ka fiscal deficit jong ngi ka long 3.75 percent, hynrei la bthah ïa ka CAG ban kynthup ïa kane ka ‘special capital investment’ hapoh ka ram jong ngi, kaba la leh na ka bynta baroh ki jylla. Ka tnad pla tyngka mynta kan bthah ïa ka CAG ba naduh u snem ban wan, ka dei ban don ka jingïapher kaba shai, kata ba kawei kan pyni ïa ka jingduna pisa ryngkat bad ka jingbei tyngka, kaba lah ban pyni ïa ka 6.0 percent, bad kawei pat ka pyni ïa ka jingduna pisa ba shisha ha ka 3.75 percent. Da kane ka rukom, baroh kin sngewthuh ba kine ki ar tylli ki long la ka jong ka jong kaba hap ban leh la ka jong.
Kumta, kito kiba kwah ban ïohi ïa ka jingkheiñ ryngkat bad ka jingïarap ba kyrpang ki lah ban peit sha kawei ka bynta katba kito kiba pynleit jingmut ha ka jingduna pisa ki lah ban peit sha kawei pat ka liang,” la batai bniah u Sangma.
Shuh shuh u la ïathuh ba ka sorkar jylla ka la dep phah ïa ka shithi sha u AG, kaba batai ïa ka jinglong jingman. Haba jubab ïa ki jingkylli kiba kham bniah, u Myntri Rangbah ka Jylla u la pynshai ba ïa ka Utilization Certificate (UC) ba la kdew ym pat lah ban aiti sha ka Sorkar Meghalaya, da kaba ban jur ba kane ka dei ka kam hapoh ka jylla. U la ban jur ba kane ka kam kam dei kaba iadei bad ka sorkar pdeng, namar ba ka jylla ka la dep ban ai ïa ka ‘final cumulative UC’ sha ka Sorkar Pdeng.
U Myntri Rangbah u la kdew ba ka jingshim ram jong ka Meghalaya mynta ka ieng haduh 3.75 percent, kaba suk bha hapoh u pud ba la shah kaba long 4 percent. Ha ka liang ka pisa, ka jylla ka kit ïa ka ram kaba 20,000 klur, hynrei u Myntri Rangbah ka jylla u la pynthikna ba ka jylla Meghalaya ka don bha hapoh ka bor jong ka ban pynïaid bad siew ïa kine ki ram. U la pynshai shuh shuh ba na ka mang tyngka kaba 27,000 klur, tang 3,000 klur la pynngat ha ka jingshim ram.
