Shillong, Nailar, 28: Ka Hynñiewtrep National Youth Front (HNYF) Southern Border Area ha ka sngi Balang ka la kyrpad ïa ka Ingbishar Meghalaya High Court ba kam dei ban pynsngap ïa ki bor kiba nabar khamtam eh ha kaba ïadei bad ka jingdawa jong ka seng niam Hindu, ka Kumtumba Surakshya Parishad (KSP) na ka jylla Assam ban kynthup lang ha ka District Level Committee ba la khlieh da ka Deputy Commissioner jong ka East Khasi Hills District ka Kong RM Kurbah.
Ha ka hukum ba la pynmih da u Justice HS Thangkhiew la pyntip ba ïa ka District Level Committee la dep thaw na bynta ban sumar, ban pynïaid bad kiwei kiwei ki mat kiba ïadei bad ka krem Mawjymbuiñ ha kaba ïa kane ka Committee yn khlieh da ka Deputy Commissioner kum ka Chairperson bad u Additional Deputy Commissioner un long u Member Secretary, nalor kiwei pat ki dkhot ba kynthup ïa ka CPC bad ka Yatra Society.
Ha ka jingïakren bad ki lad pathai khubor, u President ka seng u Bah Kyllang Thongni u la ong, “ka High Court kam dei ban pynsngap ïa ki bor kiba nabar namarba kim sngewthuh ïa ka jingsngew jong ngi ki trai shnong, kim sngewthuh ïa ka bor (ka iktiar) jong ki Dorbar Shnong. Ka High Court kam dei ban sngap ïa ki bor ba nabar ïoh ka ïalam bakla.”
“Ka krem Mawjymbuin ka don la ka khanapateng bad kam dei ka jaka mane blei. Lada ma ngi ki briew ngi thaw stad ïa kata nga tharai yn ym don ba lah ban pdiang bad la ithuh ïa ka kum ka jaka jngohkai bapawnam ha ka ri baieid jong ngi,” ong u Bah Thongni.
U la ong ruh ba ka seng ka pdiang sngewbha ïa ka jingpynrung dkhot ïa ka Central Puja Committee (CPC) kaba mihkhmat ïa baroh ki riewngeit Hindu kiba sah ha Meghalaya namarba ki nongïalam jong kane ka Committee ki don jingtip ïa ka jingsngew jong ka jaidbynriew jong ngi khamtam ki paidbah ka mawsynram bad ki don ruh ka jingtip ïa ka bor ka itkiar jong ka Dorbar Shnong.
