Shillong, Nailar 28 : U MLA ka Mawkyrwat, Bah Renikton L Tongkhar ha ka sngi Balang u la wanrah da ka call attention halor ka jingbym ïoh khaw rashon ki nongshong shnong ka Domtynrong, ka nongrit kaba don ha constituency jong u.
Haba jubab halor kane, u Myntri ka tnad Food Civil Supplies & Consumer Affairs, Bah Comingone Ymbon u la ong ba ka sorkar jylla ka la phah bun ki jingkyrpad sha ka sorkar pdeng na ka bynta ban kyntiew noh ïa ka jingdon kiban ïoh jingmyntoi na ka National Food Security Act (NFSA) khnang ba yn lah ban pynrung lang ïa ki bym pat don ha ka thup kaba la nang kiew katba nang ïaid ka por.
Tangba, u la ong ba na ka liang ka sorkar pdeng ka la pynpaw ba kino kino ki jingpynkylla hap ban ap haduh ban ban da la dep ka jinglum khanasamari kaba thymmai.
“Watla ka sorkar jylla ka la dep ban kyrpad bunsien ban kyntiew ïa ka bhah na ka NFSA khnang ban lah kynthup lang ïa kiwei pat kum ka shnong Domtynrong hynrei ka sorkar India ka pynpaw ba kino kino ki jingpynkylla halor kane hap ban wan ynda ladep ka jinglum khanasamari,” ong u Myntri.
Shuh shuh u ong ba watla ka tnad ka la pyndep lut ki jingdonkam, hynrei ban kynthup ïa katei ka shnong ha ka thup kiban ïoh jingmyntoi na ka NFSA la sahteng na ka daw ba ka sorkar pdeng ka bhah beit thik tang ïa kito kiba rim.
“Ka sorkar pdeng ka kdew ba ka jylla ka la dap lypa ka jingbun ki nongïoh jingmyntoi na ka thup NFSA katkum ka khanasamari ha u 2011 bad lada pynkylla ïa kane hap ban ai haduh ban da dep ka khanasamari kaba thymmai,” u la ong.
Shuh shuh u ong ruh ba ka jingslem ban pynlong ïa ka jinglum ïa ka khanasamari kaba thymmai ka la sahteng noh na ka daw ka jingwan noh ka khlam COVID.
