Nongstoiñ, Nailar 27: Haduh 21 tylli ki shnong jong ka Mawshynrut MDC consti-tuency, ki la pynpaw ïa ka jingpyrshah kaba jur ïa ka jingpynkynriah jong ka Khasi Hills Autonomous District Council (KHADC) ïa kine ki shnong sha ka Rambrai-Jyrngam constituency ha ka jingpynbeit thymmai ïa ki constituency kaba dang shen.
Kine ki 21 tylli ki shnong ki dei kiba hap hapoh ki lai tylli ki Polling Station kaba kynthup ïa ka Langdongdai Polling Station, ka Mawsmai Polling Station bad ka Misei Polling Station.
Ki Nongïalam jong kine ki shnong ha ka jingïakynduh lang hynne ka sngi ha Langdongdai, ki la thaw ïa ka Joint Action Committee ki 3 Polling Station, ha kaba la jied ïa u Bah Jeremiïa Dkhar kum u Chairman bad Bah Arful Mangsang kum u Secretary.
Kine ki Shnong ki la pynpaw ïa ka jingbym sngew tynnad ïa ka jingleh jong ka KHADC, ban pynkynriah ïa ki na kawei ka constituency sha kawei pat bad ong ba kane ka dei ka jingpynhap jubor ne leh donbor khlem ka jingmynjur lang jong u paidbah.
Lah ban kdew hangne, ka KHADC ha ka 23 tarik Nailar, ka la ai jingmynjur ïa ka Bill jong ka Khasi Hills District (Constitution of District Council) (Amendment) Rules 2024, ba tyrwa ban pynbeit thymmai ïa u pud u sam bad ki shnong ki thaw jong ki Constituency ka Council.
Katkum kane ka Bill ba la mynjur, haduh 19 tylli ki constituency ki la shah ktah ha ka jingpynbeit thymmai ïa u pud u sam bad haduh 260 tylli ki shnong la rah bad pynkynriah ïa ki na kawei ka constituency sha kawei pat.
Haduh 30 tylli ki shnong kiba hap ha Mawshynrut Constituency ki la shah pynkynriah mynta sha Rambrai-Jyrngam constituency ha ka jingïapynbeit constituency thymmai jong ka KHADC.
Ka JAC ka la shim ïa ka rai ban leit ïakynduh ïa u Chief Executive Member ka KHADC Bah Pynïaid Sing Syiem bad ïa u Deputy CEM Bah Pynshngaiñ N Syiem lashai ka sngi balang ban pynpaw ïa ka jingpyrshah ïa kane ka rai.
