Shillong, Nailar 23 : U Nongïalam ka TMC uba long ruh u Myntri Rangbah ba rim ka jylla u Dr Mukul Sangma mynta ka Sngi Thohdieng u la ong ba ka NPP kaba ïalam ïa ka jingsynshar ha ka jylla ka rai ban tuh bad thied da ki MLA na kiwei ki party namar ba kam don jingshaniah ïa la ki jong ki MLA.
U la ong kat kum ki kyndon ai0241 hi, ki MLA kiba shah sospon kim lah ban shim rai ban phet na kawei ka party bad leit pynïasoh sha kawei pat. u la ong ïa kane halor ka jingleit pynïasoh ki lai ngut ki MLA ka Congress kata u bah Gabriel Wahlang na Nongstoin, Dr Celestine Lyngdoh na Umsning bad bah Charles Marngar na Mawhati sha ka NPP dang ha ka 19 tarik mynta u bnai.
U Dr Mukul u la ong ba kine ki jinglong jingman jongka saiñ pyrthei ha ka jylla kim long kiba itynnad namar kim ai jingmyntoi satia ïa ka jylla ne ia ki paidbah.
“Ka NPP ka lapmiet ban thied bad khroh ïa ki MLA jong kiwei ki seng saiñ pyrthei namar kam don jingshaniah ha la ki jong ki MLA. Nga kwah ban kren shai sha phi kum ki nongthoh khubor ruh ngam jylliew bad tih bniah phin sa tip kaei kaba nga kren bad phin sa ïohi hi ruh shen lane kham hadien ruh kaei ka ban sa jia” ong u Dr Mukul.
Ka NPP mynta ka la don 31 ngut ki MLA da ka jingwan pynïasoh ki lai ngut ki MLA ka Congress dang ha ka 19 tarik. Ha u snem ba la dep ki arngut ki MLA ka PDF u bah Banteidor Lyngdoh bad ub ah Gavin Mylliem ki la wan ban pynïasoh sha ka NPP. Da kaba kynnoh ba ka NPP ka kwah jubor justi ban ïai neh beit ha ka bor u Dr Mukul ula ong “ Ha u snem 2018 phi la ïohi kaei kaba la jia ba u MLA ba la shah jied na ka Ranikor u la shah riam ha ka ruh nar jongka NPP kaba long ka jingkylla ka saiñ pyrthei ka bym itynnad satia. Ka juh ka la jia ha u 2023 da ka jingwan pynïasoh ki MLA ka PDF sha ka NPP. Kaei ka daw don daw ban pynshong nongrim hato don kaei kaei ha ka saiñ pyrthei ba la pynlong ïa ka NPP ban khring ïa ki MLA jong kiwei ki Party. Kam don ei ei hynrei ka dei ka jingmlien jongka NPP ban tuh bad khring ïa ki MLA jong kiwei ki party bad kane ka pynpaw ba ki kwah ban ïai neh beit ha ka bor”
Haba la kylli hato ka NPP ka pyrshang ban khroh ïa ki MLA ka TMC ruh u Dr Mukul u la ong “ Nga don ka jingshaniah skhem ha ki MLA jong nga bad ngi ïalong kawei. U la ong ruh ba kiwei ki party ki dei ban pynthikna ruh ba ki MLA jong ki kin skhem bad neh beit hapoh ka party jongki. “ Mynta kaei ka bym sngewtynnad bad kaei kaba jia la dei ban ai nam beit ïa ka NPP. Lehse ka don ka thma ba jar jar hapdeng jong ki la katto katne por ba sa mih kine ki jingïapyni bor” ong u Dr Mukul.
U Dr Mukul u la ong ba ma u bad ki 12 ngut ki MLA ka Congress ki la leit pynïasoh sha ka TMC ban wanrah ka jingkylla ka saiñ pyrthei ha ka jylla ym da kata ka jingthmu ban don beit ha ka bor ym dei kum kiwei ki MLA kiba leit pynïasoh sha ka NPP tang ban don ha ka sorkar bad kane ka dei ka jingrhah bor jongki.
“ Ngam lah ban sngewthuh balei ki MLA ki sngewkutlad haduh katne ba ki kwah beit ban don ha ka sorkar nga tharai ka don kaei re kaei “ ong biang u Dr Mukul.
Haba la kylli hato ka lah ban long ba ki arngut ki MLA jongka Congress kiba la shah sospon ki lah ban shah pynduh noh ka jinglong MLA namar ka Congress ka la byrngem ban ujor sha ka ïing bishar pyrshah ïa ka NPP. U Dr Mukul u la ong kine ki dei ki kyndon aiñ kat kum ka 10th Schedule ka Riti Synshar ka ri India bad kumjuh ruh kat kum ki rai ba bun jait jong ka ïing bishar ba hakhlieh duh ka ri.
“ Kaei kaba jia, haba ki MLA ki la shah sospon ha kano kano ka seng saiñ pyrthei ne party ba ki don, kim lah shuh ban ïasoi halor kano kano ka rai ba la shim da ki dkhot jong kata ka party. Kim lah ban ïashim bynta ne ban ïasoi ïa kano kano ka shithi ban pynïasoh sha kano kano ka party namar ïa ki la sospon da ka party ba ki don. Kumta ka don ka jingïapher namar ïa u bah Gabriel Wahlang bad Charles Marngar la dep sospon da ka Congress shwa ba kin rung sha ka NPP katba u Dr Celestine Lyngdoh pat um pat shah sospon. Kumta kat kum ki kyndon aiñ kine kiba la shah sospon kim lah satia ban phet ne leit pynïasoh shawei. Na kata ka daw la sospon ïa ki namar ka dei kum ka jingkhang lad ïa ki ban leit pynïasoh shawei. Tangba kane ka shong baroh kat kum ki jingïoh pdiang jingthoh jong ka ophis u Lamphang na ki bad na ka party ruh ka ban sa shai kdar. Lada ki arngut ki la shah sospon shwa ban rai kata kim lah ban phet hynrei lada ki la dep ai shithi lypa bad sa shah sospon hadien kata ka long da kumwei” ong u Dr Mukul.
