Shillong, Nailar 22: U Lat ka jylla u la khot ïa ka dorbar ba kyrpang jong ka ïing dorbar jong ka KHADC ha ka sngi Thohdieng ka 23/Nailar/2024 ban wan rah ïa ka kaiphot kaba ïadei bad ka jingpynkylla ne phiah (Delimitation) ïa ki MDC constituency.
Ka Executive Committee ka la dei ban wanrah ïa ka kaiphot jong ka Delimitation hapoh ïing dorbar ha ka dorbar lyiur kaba la dep, hynrei haba la ïakren hapoh ka ïing dorbar la phah noh sha ka Select Committee ban peit bniah.
Hadien ba ka Select Committee ka la dep ban ïashong bad peit bniah, ka la wanrah ïa ka kaiphot sha ka Executive Committee bad ka EC ka la pan ïa ka dorbar ba kyrpang ha kaba u Lat ka jylla u la khot ïa ka dorbar ba kyrpang ka ban long ha ka sngi Thohdieng.
Kat kum ka tyllong khubor la ïathuh ba na ka liang jong ka EC ka kwah ban pdiang noh ïa ka kaiphot jong ka Delimitation jong ki MDC constituency khnang ban ïoh phah noh sha u Lat ka jylla ban ïoh ïa ka jingmynjur ïa ki shnong ki thaw kiba don ha ki MDC constituency kiba la pynkylla.
