Shillong, Nailar 18: Ka seng Forever Young Shillong (FYS), ka la phah da ka jingthoh sha u Myntri Rangbah ka jylla u Conrad K Sangma ban pan ka jingkyrshan pisa na u ban kyntiew ïa ki kam ak drama ha ki Theatre na ka bynta ban pynlong ruh ïa ka jingïalehkai ne ka music play kaba la ai da ka kyrteng “Conscience And Man”.
Ha ka jingthoh ka la pynpaw ïa ka jingïaroh ïa ka sorkar ba ka la pyrshang ban wad ïa kiba bun ki samla kiba don ki sap bapher bapher bad kumjuh ruh ïa ki paidbah jong ka jylla bad ban pynwandur ïa ki na ka bynta ka jingbha ka jylla lyngba ki scheme kum ka PRIME bad CM ELEVATE.
Hynrei ka la pynpaw pat ka jingsngewsih ba ïa ki sap ban ïalehkai lyngba ki Theatre la leh klet noh. Ka la ong ba ka kwah ban pyntip sha ka sorkar jylla ba ki don shibun ki sap ha ki kam ak drama ne ki performing art, kum ka kam acting hapdeng ki samla kaba ki la hap ban duh shisien ba ki la pyndep ïa ki jingshah hikai na ki skul namar kam don ka jaka ban sei bad ban kyntiew ïa ki sap naba kawei na ki daw ka dei ka jingduna ka jingkyrshan na ka sorkar.
“Kumba phi la tip, ka kam ak hapoh ki theatre ka dei ka kam kaba ym lah ban kamai pisa kumba ka long mynta ha ka jylla jong ngi, hynrei kan long pat ka sienjam ka ban ïalam sha ka kam kamai kaba lah ban pynmih kum ki phlim bad ki jingpynbna kiba lah ban kamai pisa hadien habud ha ka jylla bad kumjuh ruh ha ka ri bad wat sha ki ri ka pyrthei. Kumta ban shim ïa kane ka bynta ban hikai ban kyntiew ïa kane ka sap sha kawei pat ka kyrdan ngi long kiba la khreh ban shim ka jingkitkhlieh kat kaba lah da ka jingkyrshan jong ka sorkar jylla khamtam ha ka kam ban kyrshan jingïarap pisa namar ba wat ba kane ka jingleh kam dei ka kam ban kamai pisa, hynrei ka jinglut haba pynlong ïa ki jingïalehkai drama ne ki play ka long kaba heh,” ong u President u Bah Michael N Syiem.
U la ïathuh ba ka Forever Young ha ryngkatlang bad ka Maitshaphrang ka la pynlong bun ki rynsan bad ki jingïalehkai ha ki surok kiba long ha ka ktien Khasi bad Phareng. “Ngi la pyni ruh ïa artylli ki jingïalehkai ha Doordarshan Kendra, Shillong. Kawei kaba la buh hapoh ka Youtube kadei “Papa Shano Phi Don” bad ka “Burom ïa uba ïap” baroh ar ha ka music kaba dei ha ka ktien Khasi bad hadien ka English musical play ka “Juliet and Romeo”, hynrei na ka daw jingbym biang ka jingïarap pisa na ka sorkar ngim lah ban pyntreikam bha ïa kine ki jingïalehkai ha ki rynsan haduh kata ka rukom kaba donkam, kumta ngi don ka mon ban kyntiew ïa kane ka kam theatre sha ka kyrdan kaba kham shalor la ka long ka jingtbit bad ka jingbiang ka pisa bad kan wan urlong tang da ka jingkyrshan ka jong phi,” pynkut u President ka Forever Young.
