Nongpoh, Nailar, 18: Hadien ka jingshah pynjulor ki jingthung jingtep jong ki nongrep ha ki nongtrei ka Khasi Hills Autonomous District Council (KHADC) Lailad Beat House, ha ka shnong Umladoh, Ri-Bhoi District, ka kynhun ki nongrep hapoh ka lama jong ka Hills Farmer Union (HFU) ha ka sngi Thohdieng ki la leit ban ai ai mynsiem ïa ki nongrep ryngkat ki tynrai dieng kwai, ki tynrai dieng soh bad kiwei kiwei ban thung bujli biang hadien ba ki jingthung jingtep ki la shah pynjot.
Ïa ka HFU, la lamkhmat da u President jong ka Hills Farmer Union (HFU) Umling Block u samla Savington Makri da ka jingsynran lang jong u General Secretary ka HFU Seng Kmie Bah Alfonbirth Kharsyntiew bad ïa kitei ki tynrai dieng la shu synñiang da ki para nongrep katba lah ka bor.
U Bah Alfonbirth Kharsyntiew u la pynpaw ka jingsngewkhia haba ïohi ba ki nongrep ki la mad ïa ka jingshah pynjulor ki jingthung jingtep bad ong ruh kum ka kynhun kaba peit ïa ka bha ka miat jong ki nongrep ki la ïa kynduh markhmat bad ki nongrep bad ban ai mynsiem ba kim dei ban duh jingkyrmen.
U la ong ba kum ka kynhun kan ym ktaid ïa ka kam jaka puta hynrei u la buh jingkylli da kaba ong, “hato ka KHADC ka la ïoh neem ïa ka Environmental Clearance shuwa ban pom ïa ki dieng namarba wat ha ka jaka jong ngi shuwa ban shna iing ngi hap ban ïoh ka Environmental Clearance ban pom ïa ki dieng bad halor kane ai ba ki bor ba dei peit kin leh kaba donkam.”
U la ong ruh ba ka jingwan jong ki kam dei ban wan pynrem ïano ïano hynrei ka dei beit ban kyrshan bad ban ai mynsiem ïa ki para nongrep ba kim dei ban duh jingkyrmen hynrei ba kin nang bteng ïa ki kam rep ban thung ïa ki dieng, ki soh, ki jhur kumba ka Sorkar ka ju pynshlur ïa ki nongrep.
