Nongpoh, Nailar 17: Kawei ka kali Venue kaba shong 5 ngut ki briew kala hap sha riat Umling hadien ba kala shah tynrah ha kawei ka trok ha surok bah National Highway 6 hynnin ka miet haka por 7:30 eiei katba ka dang hiar na Shillong sha Guwahati.
Katei ka kali ka dei kaba don ïa u number AS 01 EH 1855 bala ñiah da u Rahul Roy, 21 snem ka rta na ka shnong Sutarpara, Guwahati, Kamrup Assam ryngkat bad 4 ngut kiwei pat kiba la shong hapoh jong ka bad donbok ba ha katei ka jingjia kitei ki briew kila shu mynsaw malu mala katba ka kali kala pra phom katba katei ka trok tang mar sien dep tynrah kala phet krad na katei ka jaka.
Ïa kitei kiba la mynsaw la rah noh sha Civil Hospital Nongpoh ban ioh ia ka jingsumar bad na ka liang ki Pulit ka Ri Bhoi ki dang pynlong ia ka jingtohkit bad thwet ïa katei ka trok kaba la phet krad bad ia katei ka kali ba la hap sha riat la sei noh mynta ka sngi, bad ka jingtohkit halor kane ka jingjia ka dang iaid shakhmat.
