Shillong, Nailar 14: Ka Hynñiewtrep National Liberation Council (HNLC) ha ka sngi Balang, ka la pynpaw biang ïa ka jingkut jingmut ban bteng ïa ka jingïakhih da kaba kiengatiar tad haduh ba ka Sorkar kan sngap ïa ki jingeh jong ka jaidbynriew Hynñiewtrep.
Ha ka kyrwoh ba la pyllait ha ka sngi rakhe ïa ka jingkhuh snem ba 37 jong ka HNLC, u General Secretary-cum-Publicity Secretary ka seng Bah Sainkupar Nongtraw u la ong, “Ha ka jingdap 37 snem jong ngi, nga pynpaw ïa ka jingsngewnguh ïa baroh ki dkhot jong ka seng HNLC, ki bahaïing jong baroh ki dkhot, ki nongkyrshan, ki seng trei mon sngewbha, ki lad pathai khubor, bad ki paidbah. Ki jingaiti lut jong ki dkhot jong ngi ha kaba ïaleh pyrshah ïa ka sorkar synshar phareng kin ym long lehnohei satia, bad ngi la kut jingmut ban bteng ïa ka jingïakhih jong ngi da kaba kiengatiar haduh ba ka sorkar kan sngap ïa ki jingeh jong ngi. Ngi ngeit ba ngi dei ka jingkyrmen kaba khatduh ïa ki paidbah ka Hynñiewtrep bad ba ka HNLC ka dei ka lad kaba khatduh ïa ka Sorkar India ban leh eiei halor ki jingeh jong ngi.”
“Ha kane ka sngi, nga shu kwah ban ïathuh ïa phi ba une u bnai u dei u bnai uba kyrpang uban pynkynmaw ïa ki jingjia ha ka histori jong ka Jaidbynriew jong ngi : ka 13 tarik ka dei ka sngi iap jong u Bah Che, ka 14 tarik ka dei ka sngi kyntiew lama jong ka seng HNLC, bad ka 15 tarik ka dei ka sngi kha jong u Syiem Wickliffe,” u la ong haba ai jingmut “Ki paradoh para snam ka Bri Hynniewtrep bad ki sengbhalang (ban) to pynbna paidbah ïa une u bnai kum ka “Hynñiewtrep History Month” lane “Hynñiewtrep History Week”.”
“Lyngba kane ka sienjam, ka imlang sahlang jong ngi ka lah ban pynlong ïa ki jingïalang bapher bapher kum ki jingpyni ïa ka kolshor, ki jingpyni ïa ki histori, ki jingkren ai jinghikai, bad ki jingïalang ïathuhkhana. Kine ki jingïalang kin thmu ban pyni bad burom ïa ki jingnoh synñiang bad ki jingaiti da ki riewshlur bad ki nongïaleh laitluid jong ngi ha ka histori jong ka Jaidbynriew,” u la ong.
“Lada ka jaidbynriew kam don histori, ka mut ba kam don ïa ki jingthoh jingtar. Lada ym don ïa ki jingthoh jingtar, ka mut ba kam don ei ei.” Kumba ngi tip, ka bynta kaba kongsan jong u dieng ka long u symbai, ym u tynrai ne ki tnat jong u. Kumjuh ruh ka bynta kaba kongsan jong kano kano ka jaidbynriew ka dei ka histori jong ka,” u la ong.
“Ha kaba pynkut, nga kwah ban ong ba ka Sorkar India kan pynjot ïa ngi namar ba ngi dei ki Hynñiewtrep, lane namar ba ngi dei ki Khristan ne ki Niam Tynrai; ngi shah pynjot namar ba ngi duna ka jingtip ïalade,” pynpaw u Nongtraw.
