Hadien 37 snem sei madan ka HNLC ïa ki Nongseng jong ka

Shillong, Nailar 13: Hadien kumba 37 snem ba la Seng ïa ka, ka Hynñiewtrep National Liberation Council (HNLC) ha ka sngi Baar ka la sei madan ïa ki nongseng jong ka bad kita ki long u Bah  Bah Cherish Thangkhiew, u Bah Sounder Cajee, Bah Founder Cajee, Bah John Kharkrang, Bah Julius Dorphang, u Vincent Sangma, bad kiwei kiwei kynthup uwei u ophisar shipai India uba la shongthait bad uwei u Bank Manager.

Kane ka long katkum ka kyrwoh ba la pyllait da u Bah Saiñkupar Nongtraw, General Secretary cum Publicity Secretary jong ka Seng, kaba la phah mynta ka sngi kum ka dak ka jingkynmaw burom ïa ka jingdap 3 snem ka jingshah siat ïap u Bah Chresh Thangkhiew.

U nongïalam ka HNLC, u la ïathuh ba ha u 1987 la seng shuwa ïaka Hynñiewtrep Achik Liberation Council (HALC, hynrei ha u snem 1992, la pynkylla kyrteng noh sha ka HNLC katba ki para Achik na ka HALC ki la thaw ia ka ALMA.

U Bah Saiñkupar, u la ong ruh ba u Bah Cherish u dei tang ma u uba seng ïa ka HNLC u bym shym la pyndem ïa la ki nongrim ne die lut ia ki briew jong u. Shuh shuh ka kyrwoh ka ong ruh ba katba nang mih ki sngi, bun na ki nongïalam kiba shlur bad kiba stad ha ka jingmut jingpyrkhat ki la shah thombor bad shah pynjot ha ka rukom kaba ryntih. Kawei hadien kawei, la shah pynbud, shah pynsngap, shah pynsngap jar, shah thied noh, shah ïalam bakla katba ki agent sorkar pat ki nang rung bad pynthut ïa ki rukom treikam jong Seng.

Wat la ki snem 80 bad 90 ba la sakhi ïa ki sur kiba bun kiba kyrshan bad sngewthuh ïa ka jingïaleh jong  ka Seng, hynrei tang khyndiat ngut eh kiba dang ïai neh haduh mynta.

. “U Bah Cherish u ju ong ia nga ba ym don ka spah ne burom kaba kham khraw ban ïa ka jingpyllaitluid”, la ong u General Secretary ka Seng.

U la ong ruh ba dei ma u, uba la wanrah ia ka jingmut ban ïakhlad bad uba la pule bniah ia ki jingïaleh jong u Wickliffe Syiem. Haba ïathuh shuh shuh ïa ka jingim jong u nongïalam ba la khlad noh, u Bah Saiñkupar, u la ong ba u Bah Cherish u long u riew shemphang u bym ju pynïakhlad ïalade na ki paidbah. U la ïoh ïa ka kyrteng “u nongpynkylla dur” ne u Master of Disguise hapdeng ki katto katne ki nongialam jong ka thaiñ shatei lam mihngi namar ka jinglah jong u ban treikam da kaba rieh ha ka nongbah Shillong, kaba la pynkulmar ïa ki bor pynjari aiñ bad ki bor sorkar.

Ka HNLC ka la ong ruh ban kaba shaniah tang ha ki politishian bad kiwei kiwei ki riewstad ban ïasaid ïa ka kam jong ka ‘Jaidbynriew’, yn hap ban ap slem. Bun kiba khot ki nongmihkhmat bad ki politishian jong u Hynñiewtrep kiba don pisa hynrei kim don ka jingïatylli; kim kwah ban ïawan lang ha ka liang ka ïoh ka kot ban tei ïa la ka jong ka imlang sahlang.U la ong ruh ba ka pisa kaba ngi pynlut man ka sngi ka iaid tang shisien ha ka shnong ka thaw jong ngi, hynrei katba nang bun ka pisa ka iaid 19 – 90 sien ha ka pla jong ki bym dei ki riewlum.

Ka sorkar kam don ka jingtreikam kaba shai ha ka liang ka ïoh ka kot ki briew ki im ha ka jingduk bad ka Meghalaya ka la kylla long ka jylla kaba poh kyrdan ha ka ri India.

Ha kane ka sngi ba ka Seng ka kynmaw burom ïa ka sngi ïap jong u Bah Cherish, ka pateng jong u ka dang neh. Kumba leh ki longshuwa jong ngi, u Bah Cherish u la iehnoh ia ka lynti na ka bynta ka jinglaitluid jong ngi.

“Ki Nongshun ki lah ban pynïap ïa u da u kuli, hynrei kim lah ban pynduh ïa ki jingmut jingpyrkhat jong u”, la ong u Bah Saiñkupar.