Ka rai jong ka Dorbar Shnong Mawsynram ka long kaba shongnia: Paul Lyngdoh

Shillong, Nailar 06: U Bah Paul Lyngdoh uba dei u Myntri jong ka Sorkar Jylla uba khmih ïa ka tnat Jngohkai Pyrthei u la ai jingkyrshan ïa ka rai ba la shim da ka Dorbar Shnong Mawsynram ban ym ailad ïano ïano ruh ban pynlong ïa kano kano ka jinglehniam ne ka jingmane blei hapoh ka krem Mawjymbuiñ, ka krem kaba pawnam bha ha ka shnong Mawsynram.
Ha ka jingïakren bad ki lad pathai khubor ha ka Sngi Baar u Bah Paul Lyngdoh u la ong ruh ba kum ka ri India kaba ai ïa ka jingmane Blei laitluid yn ym lah satia ban shu pynlong ïa kano kano ka jinglehniam ha ki jaka jngohkai pyrthei bad ha kajuh ka por u la ïathuh ruh ba na ka liang jong ka Dorbar Shnong kam pat pyntip eiei ruh sha ka Sorkar Jylla halor ka jingshim rai ban khang ïa kano kano ka jingthmu ban pynlong ïa ka jinglehniam hapoh ka krem Mawjymbuiñ.
U Nongai ktien ka National People’s Party (NPP) u Bah HM Shangpliang u la ong ba ka Mawsynram, kaba la tip kum ka shnong kaba jur slap tam eh ka don kam ban pynneh pynsah kum ka jaka kaba paw nam ha ka ki kam shang kai pyrthei ym kum ka jaka ban mane blei.
Kane ka jingkren jong u ka la wan hadien ba ki la don katto katne ki kynhun niam kiba kwah ban pynkylla ïa ka Krem Mawjymbuiñ kaba don ha East Khasi Hills kum ka jaka mane blei.
“Ha ka kyrteng jong ki nongshong shnong ka Mawsynram bad kumjuh ruh ha ka kyrteng jong ka NPP party, nga kwah ban ong ba ka rai ba la shim da ka Dorbar Shnong ka Mawsynram ba kim shah ban pynlong ïa ka Krem Mawjymbuiñ kum ka jaka mane Blei ka long kaba bha bad ïa kane donkam ban ai ka jingïaroh,” ong u Bah Shangpliang haba kren sha ki lad pathai khubor.
U Bah Shangpliang u la ong ba ka krem Mawjymbuiñ ha Mawsynram ka la dei kaba la don hapoh ka tourism map jong ka Meghalaya lah slem bha bad kane ka jaka ka la khring bha ruh ïa kiba bun ki nongwan jngohkai ka kylleng ka pyrthei.
U la ong ruh ba ka tnat tourism ka la pynlut da ki lak ban kyntiew ïa kane ka jaka lyngba ki jingtei kiba bun jait bad ki lad ai jingkyrshan, ïa ki briew kiba im jakpoh bad kumjuh ruh ïa ki nongshang suwari kiba wan sha kane ka Krem.
“Kane ka krem ka la ïarap ruh ïa ki nongshong shnong ban im jakpoh lyngba ka jingwan jong ki briew kiba wan jngohkai sha kane ka thaiñ,” u la bynrap.
U Bah Shangpliang u la ïathuh ruh ba ka Mawsynram ka don ïa artylli ki krem kaba kynthup ïa ka Mawjymbuiñ bad ka Krem Puri kiba dei na ki krem kiba jrong bha kiba donkam ban wat jingtip.
Ha kawei pat ka liang, ka Hynñiewtrep Achik National Movement Mawsynram Circle ha ka 6 tarik Nailar, 2024 ka la mih shakhmat ban ai ïa ka jingkyrshan kaba pura ïa ka rai jong ka Dorbar Shnong Mawsynram kaba long ha ka 27 tarik, Naitung, 2024 ban ym ai shuh ïa ka No Objection Certificate sha ki kynhun kiba thmu ban leh niam hapoh ka krem Mawjymbuiñ kaba hab hapoh ka jingpeit jingkhmih bad ka jinglong trai da ka shnong Mawsynram, East Khasi Hills District.
Lyngba u kyrwoh ba la phah sha ki lad pathai khubor da u President jong ka seng u Bah W. Shangpliang la phah ruh ryngkat bad ki dur ba la shon hi da ka seng ha ki snem ba la dep ba la pyni ïa ka jingbret jaboh pathar hakhmat ka krem Mawjymbuiñ.
Shuh shuh ha une u kyrwoh ka seng ka la pynpaw ba ka burom ïa baroh ki jaitniam katkum ka riti Dustur jong ka Ri India hynrei kiwei ruh ki dei ban burom ïa ka hok longtrai bad ïa ki Adong ba la pynjari da ka Dorbar Shnong Mawsynram.