Ka UDP kan ym lait na jinghap ka tnum Assembly, ka bamsap naduh ophis haduh surok : Pala

Shillong, Jymmang 28 : U President jong ka Meghalaya Pradesh Congress Committee, Bah Vincent H Pala ha ka sngi Saitjaiñ u la kynnoh ba ka bamsap ha kane ka sorkar mynta ka la long ha ki liang baroh la ka long naduh ophis haduh ha surok.
Haba kren ïa kane hadien ka jingïalang pynbna kyrtong jong ka party ha Mawkynrew, u Bah Pala u la ong, “Ka UDP ruh kam lah ban lait na ka jingkhyllem jong ka tnum Iing Dorbar. Mutdur lada dei ha ka por ba long Dorbar katno tylli ki synduk ïap briew yn sei nangto bad lada dei ha ka por ba ki dang trei ruh katno ngut kiban ïap hangto. U Blei u dang ïada ka hap mynmiet.”
Utei u heh Congress u ong ruh ba ha ka jylla hi katei ka jingshna ïa ka Iing Dorbar kadei ka jingtei kaba ñiewkor tam kaba ki ong baroh ba kadei ka jaka ba kyntang tam ha ka ri synshar laitluid. “Ha India hi baroh kawei, nga tharai kadei ka jingjah burom ïa ka Meghalaya, ka jingjah burom ïa ka ri jongngi hi baroh kawei,” u la bynrap shuh shuh.
Kumban shu kdew hangne, na ka liang ka sorkar jylla dang shen ka la pynbna ba ka la phah ban pynlong da ka jingtohkit halor ka jinghap kynsan u tnum (dome) jong ka Iing Dorbar Thawaiñ ka jylla ha ka sngi U Blei jong ka taiew ba la dep. Ha katei ka jingjia namar ka jingjia dang step ym shym la don satia kano kano ka jingjulor ha ka jingim briew.