Shillong, Nailar, 6: Hapdeng ka jingshah pynbor kaba jur, ka Meghalaya Public Service Commission (MPSC) ka la rai ban pan ïa ka jingmynjur na ki kyrtong kiba ïakhun ïa ka Meghalaya Civil Services (Preliminary) Examination na ka bynta ban pyni paidbah ïa ki Marks.
Ha ka jingpyntip paidbah la pynmih da u Chief Controller of Examination jong ka MPSC ha ka sngi Baar, la ong, “da ka jingïoh pdiang ïa ka jingkyrpad ban pynmih paidbah ïa ki Marks na kiba bun ki liang bad ba donkam ban ïada ïa ka hok shimet jong ki kyrtong kiba ïakhun ïa ka Meghalaya Civil Services (Preliminary) Examination; ka Meghalaya Public Service Commission (tang shisien, ha ka case ba kyrpang) ka pan ïa ka jingmynjur salonsar na ki kyrtong ha kaba ïadei bad ka jingpynbna paidbah ïa ki marks ki jong ki. Ki kyrtong kiba kwah ban pynbna paidbah ïa ki marks la ai jingmut ba kin phah ïa ka jingmynjur ha ka link https://forms.gle/9YWpc2Y4uoZ8vS7.”
Ka jingpynbna ka ong ba ka Link kan plie naduh ka 7 tarik Nailar, (12: baje mynsngi) haduh 16 tarik Nailar, (5:00 baje janmmiet)/
Ki Marks jong ki kyrtong kiba kyntait ban ai ïa ka jingmynjur la buh ruh ïa ka link (ba thoh ‘EM’) ki bym kwah ban ai jingmynjur khlem da pyndap ïa ka form yn ym lah satia ban pynmih paidbah. Ka jingpynbna ka bynrap, na ka bynta ki jingpyni paidbah, baroh ki kyrtong, (kynthup lang ïa kito kiba ym shym la pynmih ïa ki marks) yn ai jingbit ban peit ïa ki marks ki jong ki lyngba ka OTP based system. Ïa kane la leh ban ïada ïa ka hok longtrai jong ki kyrtong.
Ka jingpynbna ka ong ruh ba kan ym ïakren shuh nangne shakhmat halor kane ka mat bad pynpaw ruh ba ka rai jong ka Commission lyngba ka shithi ba la pynmih ha ka 7 tarik Lber, 2024 kan ieng.
Ha ka taiew baladep, ka Khasi Students’ Union (KSU) ka la pynlong da ka jingïakhih rah plakad ban dawa ïa ka jingthungkam kaba khuid da kaba pynbna ïa ki Marks jong ki nongïakhun ïa ka MCS preliminary examination.
Ka Union ka la kyrpad ïa baroh ki kyrtong ban ïasnoh kti lang ban ïakhun pyrshah ïa ka jingkynnoh ba ka don ka jyrsieh bamsap ha ka Commission da kaba ai jingmynjur ban pyni paidbah ïa ki Marks jong ki.
