Shillong, Jymmang 28: U Nongïalam ka NPP bad Myntri Sorkar James K Sangma ula thalaiñ tyngeh ïa u Nongïalam ka Liang Pyrshah Dr Mukul Sangma halor ka jingkynthoh pyrshah ïa ka kaiphod bad jingai jingmut jpng ka Inquiry Committee ba laitluid halor ka jingkynnoh bamsap hapoh ka Tnad Meghalaya Energy Corporation Limited (MeECL).
“Mynta bala mih ka kaiphod bad kam long kat ku ka jingkwah jong u (Dr Mukul), kam mut ba phin shu lynñiar khleh biej pyrshah ïa ki kyndon jong ka jingtohkit” ong u James haba iakren bad ki nongthoh khubor.
U James ula ong “Nga sngew ba u dei ban pdiang ïa ka kaiphod namar ka jing kynthoh pyrshah ïa ka kaiphod ka mut ruh ka jingkynthoh pyrshah ïa u briew uba khlieh ïa ka jingtohkit”.
Ha ka sngi palei, u Dr Mukul ula pynpaw ïa ka jingbym sngewtynnad pyrshah ïa ka kaiphod jong ka Inquiry Com mittee bad ong “Naduh kaba sdang hi, nga la pynpaw ïa ka jingsngewkhia hadien ba nga khmih ïa ki kyndon jong ka jingtohkit ban don ka Commission of Inquiry ka ban ngam jylliew halor ka jingkynnoh bamsap hapoh MeECL bad namar kata, phin nym lah satia ban sei ïa ka jingshisha da kine ki kyndon”.
U Dr Mukul ula ban jur ba dei ban don da kawei pat ka jingtohkit halor kino kino ki kam ba don ka jingkynnoh bamsap.
U Myntri Rangbah ka Jylla Conrad Kongkal Sangma ula ong ba ka Committee kam shym la lap satia ïa kano kano ka jingleh tam ha ka rukom thied ïa ki tiar ki tar kat kum ka kaiphod.
U Conrad ula pyntip ba ka Independent Inquiry kala ai jingmut ïa ka Sorkar Jylla banthung noh da u Chairman-cum Managing Director (CMD) ba pura hapoh MeECL bad ruh ban wanrah ïa ka rukom treikam ba thymmai haba iadei bad ka kam thied tiar thied tar.
Haba pynpaw ba um pat ïohpor satia ban pule ïa ka kaiphod, u James ula ong “Hynrei phi tip ba ngi hi ngi bud kat kum ki kyndon bala buh bad kam shym la don ka jinglehtam bad lada u Myntri Rangbah u ong ba kam don eiei ha ka kaiphod, ngi hap ban ngeit ba kam don eiei namar ka dei ka jingtohkit bala khlieh da u Justice bala shongthait jong ka High Court”.
