Shillong, Jymmang 28: Ki paidbah nongshong kiba don sha shiliang ka wah Dolai ha kahppud bad ka Bangladesh hapoh ka Mawsynram Blok kila ïa kynduh jingeh ha ka kit ka bah namar kam shym don ka sub-way haba shna ïa ka jingkieng ïaid kali halor katei ka wah.
U President ka Hills Farmers Union jong ka Mawsynram Block u bah Odas Pdahkasiej u la ong ba ka jingbym don ïa ka sub-way ha katei ka wah ba shna ïa ka jingkieng kala buh ïa ki nongrep ha ka jingeh bad kum juh ïa ki paidbah ka thaiñ baroh kawei.
Ka jingbym don ïa ka sub-way kala wanrah ruh ïa ka jingkiew dor ki marbam mardih namar ki kali ba kit ïa ki mar ki mata yn da poi ha katei ka jaka hap ban pynhiar bad kit noh da u briew ban pynkit pat ha kawei ka kali kane ka ka ktah ïa ka jingkiew dor ki mar bam mardih.
La ong ba ïa kane ka jingkieng la sdang ban shna ha kine ki bnai tlang mynta u snem bad ha ka por ba dang rang ka bneng ki kali ki ïaid na um, hynrei mynta da la wan ka lyiur ki kali kim lah shuh ban ïaid lyngba katei ka wah bad haba jur slap ki briew ruh kila shitom ban ïaid na shiliang sha shiliang.
Naka liang jong ki nongrep katei ka thaiñ bad kum juh ki riew paidbah ki kyntu ïa ka PWD, khamtam ïa ka ophis jong ka Mawsynram PWD Division ba kan phah shna ïa ka subway halor katei ka wah khang ba ki kali kin ïoh ïaid khnang ba kan nym don ka jingkiew dor bad ka jinglut ksan ïa ki paidbah.
