Shillong, Jymmang, 28: Ka Raid Laban Secondary School ha ka sngi Palei ka la rakhe ïa ka jingdap 50 snem ha ka jingïaid lynti ban ai ka jingshakri ha ka liang ka pule puthi ha kane ka jylla.
Ha kane ka sngi u Myntri ka Sorkar Jylla u Bah Sanbor Shullai uba long ruh u MLA jog ka South Shillong Constituency u la long kum u kongsan ha ryngkat ka jingsakhi lang jong ki nonghikai, ki khynnah skul nalor kiwei de kiba la shah khot sngewbha.
U Bah Sanbor Shullai uba la long u kongsan ha kane ka sngi, u la ai ka jingïaroh ïa kane ka skul kaba la lah ban kynjoh sha u mawmer ba 50 snem ha ka kam hikai bad ban saiñdur ïa ka lawei jong ki khynnah pule ha ka jingnang jingstad.
Ka jingdon jong kane ka skul la lah ban pynmih ïa bun ki khynnah skul kiba la nang la stad bad kiba la paw ha ka kam ïalehkai phutbol kum u samla Aiborlang Khongjee, ka kong Wansuk kaba dei ka kynthei Khasi ba nyngkong ban kiew sha u Lum Everest bad kiwei kiwei.
La pynphuh pynphieng ïa kane ka jingrakhe da ki jingrwai bad ki jingshad na ki khynnah skul.
Ha kane ka sngi la pynkup burom ruh ïa ki khynnah skul kiba wan shakhmat ha ka jingpule bad kiba la lah ban wanrah nam bad burom ïa ka skul baroh kawei.
