Ngi khmih lynti ïaka jaka pule ha Ri Bhoi, hynrei thmu wanrah pynban da ka ktem khalai

Nongpoh, Jymmang 28: U Samla Lambokstarwell Marngar President ba rangbah duh ka KSU u la ther tyngeh ïaka sorkar haba kren haka jingïalang pynkup burom ïaki samla pule ha Ri-Bhoi, ba ka sorkar kam don ka jingkitkhlieh ban peit bad khmih ban kyntiew ïaki khun samla haka jylla khamtam ban shna ïaki jaka pule ban ïaryngkat dor bad kane ka juk kaba mynta kaba baroh baroh ki ïabeh ban ioh ka jingnang jingstad kaba paka, kumba ka seng ka ju ai jingmut bad buh ruh ki mat jingdawa ban buh da ki jaka pule kiba bit ba biang ha man la ki district headquarter, hynrei ka sorkar ka sngap jar jar bad kumba iuh tdong bseiñ la wanrah pynban ïa kata ka aiñ ban thaw bad buh ïaka ktem khalai ha Ri-Bhoi.
U la ong ruh ba ka pule ka puthi ka long ba kongsan, hynrei hato ka sorkar ka phaikhmat mo sha ki district bapher bapher ki jaka pule ba bit ba biang ba ïaryngkat kyrdan bad kane ka juk ba mynta ba kan long ka jingkyrkhu ïaki longiing ba duk ki bym kot bor wat tang ban phah skul ha sor Shillong ban kyntiew ïaka pule ka puthi haka jylla ban rah ruh ïaka burom kham shajrong haka liang ka pule ka puthi, hynrei I kumba ka sorkar kam don mon ban sdang pynban wan thawlad ban wanrah da ki ktem khalai kibym ai jingmyntoi eiei ïaki khun samla.
Ka mih ruh ka jingkylli mano ba pyntroin ïaka pule ka puthi bad pynduh myn siem ïaki samla pule, ngin kynnoh ïaki kmie ki kpa? Ki nongsynshar shnong? Ki nonghikai? Ne kita ki ba shong ha Secretariat buh jingkylli u Bah Lambok hakhmat ki samla pule bad ki kmie ki kpa.
Ka dei ka por ïaki kmie ki kpa ban puson bad pyrkhat bha kiei ki lad ki lynti ban kyntiew ïaki khun ki kti haka liang ka pule ka puthi ban phaikhmat ruh sha ki rukom pule bapher bapher khamtam ki Civil Service Exam ba ki khasi kim dei shuh ban shaniah tang haki nongwei ban bat ïa u lakam ka synshar khaddar hynrei kala dei ka por ba ki khun samla Khasi Khara kin mih shakhmat da ka jingsngew sarong ban kynjoh sha ka thong haki jingpule bapher bapher bad ki eksamin bapher bapher ban long ka jingsarong ïaka iing ka sem ka shnong ka thaw bad ka jylla khamtam ka long kum ka jingpynphong pangsngiat ïaki kmie ki kpa.
Namar kata naka liang u samla Lambokstar Marngar u la ai mynsiem ruh ïaki khun samla ha katei ka sngi ba ki dei ban minot thop haki jingpule jong ki ban don ka mynsiem ïakhun bad ki briew ba sha kiwei ki jylla, khlem pep dei hangta ba ka jaidbynriew kan kiew bad kan don ruh la ki jong ki ophisar ban bat ïa u lakam synshar naka bynta ka bit ka biang bad ban ïada ïaka ri bad ka jaidbynriew naki nongshun ba jar jar, u la bynrap.