Shillong, Jymmang, 27: U State President jong ka National People Youth Front (NPYF) u Bah Kitboklang Nongrem ha ka Sngi Thohdieng u la pynshai ba ka National People’ss Party (NPP) kam shym la ïoh satia ïa ka shithi khot sngewbha sha ka jingïalang ba la pynlong da ka Khasi Jaiñtia Church Leaders Forum (KJCLF) bad ki nongïalam jong ki Seng Saiñpyrthei bapher bapher kiba don hapoh ka jylla Meghalaya na ka bynta ban ïathir ïatai ha kaba ïadei bad kiba bun ki mat hashwa ba ka jylla Meghalaya kan pynkhreh ban leit sha ka elekshon jong ka Ingdorbar Thawaiñ ka ban sa long ha u snem 2023.
Kane ka jingpynshai ka long hadien ba la mih ka khubor ba dei tang ka NPP ka bym shym la poi sha ka jingïalang ba la pynlong da ka KJCLF ha ka janmiet sngi Palei ha Laitumkhrah, Shillong watla baroh ki nongïalam jong ki seng saiñpyrthei ki la leit ban mihkhmat ha kane ka jingïalang.
U la ong ruh ba u la pyrshang ban kylli na u State President ka NPP u Dr. WR Kharlukhi hynrei na ka liang jong u ruh u la pyntip ba um shym la ïoh pdiang satia ïa kano kano ka shithi kaba wan na ka KJCLF.
Ha ka jingïakren bad ki lad pathai khubor u Bah Nongrem u la ong ba kino kino ki jingkhot sngewbha na kino kino ki kynhun ïa ka Party ki dei ban pynpoi ha ka ophis jong u State President ka Party kaba don ha Lachaumiere, Shillong.
