Shillong, Naitung 26: U Myntri Rangbah ka jylla u Conrad K. Sangma ha ka sngi Thohdieng u la ong ba ka sorkar jylla kan pynïasoh hapdeng ka jingdawa bad ka jingïoh kam shabar ka ri bad ban pynïadei ïa ki samla bad ki agency ba lah ban shaniah.
“Kum ka sorkar ngi la tuklar ban pynïasoh ïa ki samla jong ngi bad ki agency. Ngin bei pisa ïa ki jingshah hikai jong ki haduh T. 50,000, hajar ban kyrshan ïa ka jingleit jong ki shabar ri ban leit trei, ngin ïarap pynsuk ïa ki visas bad kiwei ki kam kot kam sla ba donkam,” ong u Myntri Rangbah haba kren sha ki samla ha ka Job Fair for overseas placement kaba la long ha district auditorium ha Tura, West Garo Hills.
U la ong ba ka sorkar ka la rai ban ai ka jingkyrshan ïa ki samla kiba leit shabar ri, namar ki kam sha ki ri kiba la roi bad kiew ki bun bad ki biang. “Lada ngi lah ban phah ïa 1,000 ngut ki samla sha ki ri kum ka Japan, Singapore, bad UK, kin lah ban kamai malu mala kumba T. 1.2 lak shi bnai ha kaba kin lah ban pynlang ka pisa bad ha kaba khatduh kan noh synniang sha ka jingkamai ïa ka state’s foreign exchange,” u la ong.
“Ka jingbun ki briew ha ki ri kiba la kiew ki la nang duna bad kim don ki samla kiba biang ban trei. Da ka jingdon bun ki samla ka India ha ka pyrthei, bad ka jingdon ki samla ha ka jylla Meghalaya, ka don ka lad ban phah ïa ki ban leit trei sha kine ki ri hadien ba ki la ïoh ki jinghikai kiba biang bad ki jingkyrshan ba ïadei ruh halor ki kot ki sla na ka sorkar,” u la bynrap.
Haba kren shaphang ka jingjngoh jong u ïa ka ri Japan, u Myntri Rangbah u la ong, “Arngut ki nurse ki la ïoh ban trei ha Kobe, Japan ki la pynpaw ka jingkmen ba ki la ïoh ka lad ban trei ha kane ka ri. Nga la ïakynduh bad ki markhmat ha Kobe bad la kynduh ruh ïa ki bor pynïaid jong ka hospital. Katei marwei ka hospital ka donkam 700 ngut ki nurse manla ka snem. Ki donkam ïa ki samla naba ka ri jong ki ka mad ïa ka jingduna ki samla kiba trei halor ki bynta bapher bapher.”
“Ka la don ka jingdawa ym tang ban trei ha ki kam nurse hynrei ha kiwei ruh ki jaitkam kum ha ki kam ïarap ha ki liengsuiñ, hospitality, music, bad kiwei,” ong u Myntri Rangbah da kaba bynrap ba ki samla ka jylla ki lah ban shim kabu ha kine ki lad.
Ha ki khyndiat bnai ban wan, kumba 27 ngut ki samla na ka jylla kin leit trei ha ri Japan, 44 ngut ha Singapore, bad 50 ngut ha UK ha ki kam nurse.
Haba kren halor ki jingsngewkhia shaphang ki jingtieng bad ki jingshaniah u la ong ba la bynshet ïa kane ka bynta ha ka Meghalaya Skill Development Society (MSSDS) bad ka tnat Labour, Employment & Skill Development Society ban pynithuh bad ban wad ïa ki agency kiba dei hok na ka bynta ka skill, ka jingnang ïa ki kyntien, bad job placement.
“Ki samla jong ngi ki lah ban shaniah ha kine ki agency naba ngi la wad da kiba bha tam, kumta ym dei ban tieng. Ngi buh hakhmat ïa ka jingshngaiñ ki nongshong shnong ban pynthikna ba kin ïoh ka kamai kaba biang bad don jingmut,” u la bynrap.
