Shillong, Naitung 23: U Myntri Rangbah ka jylla u Conrad K Sangma ha ka sngi ba-ar u la buh ïa u maw nongrim na ka bynta ban tei ïa ka Apiculture Multi Facility Centre ha Mellim kaba ha South West Garo Hills ha ka jingïadonlang u Myntri ka tnat pule puthi u Rakkam A Sangma bad u MLA Sanjay A Sangma.
Ïa ka pisa kaba la mang kumba T. 1.52 klur ban pyntrei kam ïa kane ka project la aiti sha Mellim Area Beekeepers Society, bad ka first instalment na ka bynta kaba la kot sha ka T 67 lak la pynlait. Kane ka project ka kynthup ïa ka jingtei ïa ki ïing, ki surok bad ka boundary wall bad kumjuh ruh ïa ka storage jong ki kam ri ngap.
La ong ba ki la don kumba 200 ki nongrep ngap kiba don bynta ha ka kam ri ngap ha Mellim. Kane ka rai ban buh ïa ka centre la shim da ka jingai jingmut jong ka Beekeepers Society ha ka jingleit jurip jong u Myntri Rangbah ka jylla sha kane ka thaiñ ha ka 6 tarik mynta u bnai.
“Kane kadei ka jingshim khia jong ka sorkar bad ka jingaiti bad jingangnud jong ka sorkar ban kyntiew ïa ka jylla,” ong u Myntri Rangbah ka jylla.
U la ong ruh ba ka sorkar ka la shim khia ha kaba ïadei bad ka Apiculture, Floriculture bad ka jingrep ïa ki tit. “Kane ka cluster kan ïarap ïa ki project ha ki lai tylli ki thaiñ kum ka Khasi, Jaiñtia bad Garo Hills, kiba nga la shim khia bha.”
U la ong ba kane ka project kan ai bor ïa ki nongri ngab ha Mellim, bad kan treikam ruh kum ka training centre.
Ban kyntiew ïa ki kam rep bad ri ngap u la ong ba ka sorkar ka la buh ïa ki processing unit ha ki jaka bapher bapher. “Ha Rongara kaba ha South Garo Hills, ka sorkar ka la buh ïa ka jackfruit processing unit, ha kaba kane ka la ïarap bha ïa ka jylla,” u la ong.
U la ïathuh ruh ba ka sorkar ka la trei shitom ban wanrah jingkylla ha ka ïoh ka kot jong ki nongrep bad kiba trei ha kiwei pat ki jylla, “Kum ka sorkar, ngi la kyntiew ïa ki SHG, ki producer group, bad kiwei kiwei kiba long ka jingdonkam ïa ka jylla Meghalaya.
“Ka la don ka ïew na ka bynta ban kyntiew ïa ki kam thung syntiew ha ka ri. Ki Nongbah kum ka Delhi bad Mumbai ki thied ïa ki syntiew na Thailand bad Singapore. Ka sorkar ka don ka jingthmu ban kyntiew ïa kane ka jaitkam rep syntiew ha kaba kane kan ïarap ïa ki nongshong shnong jong ka jylla.”
