Wer ka ‘Dorbar Ki Waheh Kur Ri Jaiñtia’ sha ka jingïalang ban pynneh pynsah ïa ka Jait ka Kynja

Jowai, Naitung 22: Ka ‘Dorbar Ki Waheh Kur Ri Jaiñtia’ kawei na ki kynhun kaba la mih pyrthei ban ai jingïada ïa ka ‘Jait ka Kynja’ kaba mih na ka kmie hapoh ka Ri-Lum Jaiñtia, mynta ka sngi kala pynbna ba kan don ka Dorbar paidbah ki Waheh Kur ka ban long haka 27.07.2024 (Saturday) naduh ka por 11 baje mynstep ha ïing Dorbar ka Chilliang Raij, Jowai.
Kane ka Dorbar ka long shi bynta ban ïaphylliew jingmutlang hapdeng ki Waheh Kur naduh ki President, ki General Secretary bad ki dkhot Executive Committee jong ki Jait Kur bapher bapher hapoh ka Ri-Lum Jaiñtia.
Ha katei ka sngi yn ïatai bniah halor kumno ban pynbor ïaka JHADC ba kan pyntreikam noh ïaka kyndon ban ithuh ïa ka Jait ka Kynja katkum ka iktiar jong ka 6 Schedule, haka juh ka por ka Dorbar Ki Waheh Kur Ri Jaiñtia ka kyntu jur ban peit bha ïaka rukom ai syrnod Schedule Tribe katkum ka aiñ bala pynkup bor daka sorkar India.
U ma Khroo L. Pariat uba dei u President haka jingkren sha ki lad pathai khubor ula ong ka jingpynlong ïa kane ka Dorbar ba heh haka 27 tarik mynta u bnai ka long kum ka dak jong ka jingsdang ban seng nongrim ïa ka lawei jong ka Kur ka Jait kaba mih na ka kmie.
Kumba long mymta ula ong ka jaitbynriew kaba sdang ban shah thyllep ha ki briew ba nabar kiba wan rung shnong shapoh ka Ri ba ieit jong ngi, kumta u kyntu jur ïa ki nongïalam Kur bapher bapher napoh ka Ri-Lum Jaiñtia ba kin pyllait por khnang ban wan sha kane ka Dordar haka sngi saitjait 27 tarik.
Ha kane ka jingïalang yn wan ban ai jingbatai bniah da ki riew proh pyrkhat ki ban ai jingkren halor ka Dustur, ka jingmanbah jong ki Kur, ka aiñ 6 Schedule Tribe bad kiwei kiwei de.