Shillong, Naitung 19: Ka Khasi Students’ Union (KSU) ha ka sngi Thohdieng ka la shim ïa ka rai ban bteng ka jingpynjur ban khynra ïa ki bar jylla kiba wan bylla sha kane ka jylla tat haduh ba ka sorkar ka la long kaba la khreh ban buh ïa ki aiñ ki ban tehlakam ïa ka jingwan rung kyrthep ki bar jylla sha kane ka jylla.
ïa kane la ong da u President ka KSU u Bah Lambokstarwell Marngar hadien ba la ïashim bynta ha ka jingïalang ba la khot da u Myntri Rangbah ka jylla u Conrad K Sangma ha secretariat.
“Ngin bteng ban pynjur ka jingkhynra nongbylla bar jylla tat haduh ba ngi la ïohi ba la buh ïa ki aiñ ban tehlakam ïa ka jingwan rung kyrthep ki mynder ri da kaba pynthikna ruh ba dei ban pyntreikam ïa ka Inner Line Permit (ILP) bad ka Meghalaya Residents Safety and Security (MRSSA), 2016,” ong u Bah Marngar.
Haba kylli u President ka KSU u la ong ba u Myntri Rangbah u la ïathuh ba shen un sa khot ka jingïalang jong baroh ki sengbhalang ban ïasyllok halor ka mat MRSSA.
“Ngi dang hap ban ïohi ïa ka jingpan jingmut da ka sorkar pdeng haba ka la pynphai biang ïa ka MRSSA hynrei wat hapdeng kane ngi banjur ba dei ban pyntreikam ïa ka MRSSA, 2016 ha kaba la thaw ïa ka district task force (DTF) kaba la khlieh da ki DC bad SP nalor ki nongïalam shnong hynrei imat ki DTF ki la treikam tang hi ki 7 tylli ki shnong ka nongbah Shillong, namarkata ngi ban jur ïa ka sorkar ban peit ïa ka jingwan ki briew nabar sha ka jylla lyngba ki kot ki sla kiba biang,” u la ong.
“Kine ki kam khynra mynder bad bar jylla ka dei kum ban pynkyndit bynriew ïa ka sorkar bad ban pynbor ïa ka sorkar pdeng ba ka dei ban pyntreikam noh ïa ka ILP ha Meghalaya,” u la bynrap.
Katba u General Secretary ka KSU u Bah Donald V Thabah u la ong, “Ka sorkar ka la pynthikna ïa ngi ba kan peit ïa kine ki mat hynrei kumba ngi la ong, ngi la thait ïa kane ka kyntien khmihbniah ne “examination” naba ka lah ban shim shi bnai, arbnai lane haduh ka 5 bad 10 tylli ki snem. Kumta ka KSU kan ïaibteng ban talasi ïa ka jingwan jong ki briew kiba nabar sha ka jylla.”
“Lada phi peit ha ka Inter-State Migrant Workmen Act, ki kot kiba donkam ki long ka photo ID bad ka police verification na ki jylla ba ki wan nalor kiwei pat ki kot. Hynrei ha ka Act kaba thymmai, ka jingpynshisha na ki pulit kam don. Kumta ngi la kyntu ïa ka sorkar jylla ba dei ban buh ruh ïa ka police verification naba kadei kaba donkam ha ka jingpynrung kyrteng ïa ki nongbylla kiba wan nabar jylla,” u la ong.
“Kumjuh ruh ka Inter-State Migrant Workmen Act ka la ong ba dei ban pynshitom ïa u contractor, uba pynkheiñ ïa kane ka aiñ kaba thymmai, ki hap ban siew haduh T. 5000 hajar. Shu pyrkhat ki contractor ne company kiba heh na ka jylla ne shabar ka jylla ki lah ban siew da kaba suk ïa kane ka pisa kaba tang T. 5000, hynrei lada ka don pat ka jingshah shong along kamut kan ktah ïa ki bad kin shah buh dak ïong,” u la ong.
U Bah Thabah u la ong ba la ïathuh ba kane sorkar NDA ba la ïalam da ka BJP ka la pyntip sha ka sorkar MDA ba la ïalam da ka NPP ba ka jingpyntreikam ïa ka ILP bad MRSSA kan pynkheiñ ïa ka Article 19 jong ka Riti Synshar ka Ri ha kaba kan pyrkhing ïa ka rung ka mih ki briew na kiwei pat ki jylla ka ri, hynrei halor kane kam pat don ka jingai ktien na ka sorkar pdeng halor ka ILP kumjuh ruh ka jingkynthup ïa ka ktien Khasi hapoh ka khyrnit kaba 8.
“Kumta ka jingkylli ka mih lada ka ILP ha Meghalaya kan pynkheiñ ïa ka Article 19 balei pat ka sorkar NDA ka ai ILP sha Manipur ha u snem 2019? Kumta lada ki lah ban ai ïa ki balei pat kim ai ruh ïa ngi. Ka sorkar pdeng ka ong na kadaw ka Article 19 hynrei ka jingkylli ka jong ngi ka long lada ka ILP ha Manipur bad kiwei ki jylla kum ka Nagaland bad Mizoram, Arunachal Pradesh kim pynkheiñ ïa ka Article 19 kumno la ong ba kan pynkheiñ ha kane ka jylla jong ngi bad na ka liang u Myntri Rangbah u la ong ba ngi don ïa ka khyrnit ba 6 bad kumno ka khyrnit ba 6 ka ïada pura ïa ngi bad haba peit sha ki non-scheduled area kum ka Pynthorumkhrah, Laban bad kiwei la ïohi ba la tam ka jingbun paid ki bar jylla ban ïa ki trai ri trai muluk, kumta ym lah ban ïanujor ïa ka khyrnit ba 6 bad ka ILP,” u la ong.
Halor ka jingpynslem ban buh ïa ka entry bad exit point, u General Secretary ka KSU u la ong, “ïa ka MRSSA la pyntreikam ha u snem 2016, ngi lah ban khot ba kadei ka principal Act hynrei ha ka por ba la shna ïa ka entry gate ha Umling kane ka sorkar ka la rai ban pynkylla ïa ka aiñ Act ha kaba ka la ong ban pyndap ïa kiba dang duna hynrei u Lat ka jylla u la kyntait ban ai ka jingmynjur. Hynrei mynta ngi ïoh ka khubor ba ka MHA ka la pynphai ïa ka MRSSA sha ka sorkar jylla.”
“Ka thong jong ngi ne ka jingpyrshah la ka long halor ka MRSSA, ILP ne ka Eighth Schedule. Lada phi leit ban ïakren bad ki dkhot jong ngi kiba don ha along ne kito kiba shah khot hajir kin ong ïa ka juh ka kyntien. Ngim tieng ban leit sha phatok bad ngim tieng ban shah khot hajir ha ki pulit ne ha ki police station hynrei kaei kaba ngi kwah kadei ka ILP ne ka MRSSA,” u la ong.
