Shillong, Jymmang, 27: U Myntri ka Koit ka Khiah u James PK Sangma uba peit mynshwa ïa ka tnat Sam Bording u la pynpaw ka jingsngewshngaiñ naba ka jingtohkit jong u Justice RN Mishra ba la shongthait halor ka jingkynnoh bamsap hapoh ka Meghalaya Energy Corporation Limited (MeECL) ka pynpaw ba kam don satia kano kano ka jyrsieh bamsap kumba la kynnoh.
Ka Independent Inquiry Committee ba la khlieh da u Justice RN Mishra ba la shongthait ka la pynlong ïa ka jingtohkit halor ka jingthied ïa ki tiar ki tiar, ka jingduhnong jong ka MeECL lane ka AT&C Losses, ka jingpyntreikam ïa ka Saubhagya Scheme bad ka Human Resources Management.
“Ngam dei shuh u Myntri uba peit ïa ka tnat Sam Bording bad ngam lah ban ïohi ïa ka kaiphod tohkit watla ïa ka kaiphod tohkit ladep aiti sha ka Sorkar,” ong u James Sangma ha ka jingïakren bad ki lad pathai khubor.
“Ngan ym lah ban tip tad haduh ba ngan da ïohi ïa ka kaiphod tohkit. Ngi la bud ryntih ïa baroh ki kyndon bad kam don satia kano kano ka jingleh bakla bad lada u Myntri Rangbah u ladep ong ba kam don eiei ha ka kaiphod tohkit ngi hap ban shu ngeit ïa kata ba ka kaiphod tohkit kam lap eiei namarba ïa ka jingtohkit la khlieh da u Nongbishar ba la shongthait,” u la ong.
Halor ka jingkynnoh jong u Nongïalam ka Liang Pyrshah u Dr. Mukul Sangma, u James u la kynthoh kylla da kaba ong, “u Nongïalam ka Liang Pyrshah haba u ïoh kabu ban kren u kren ïa kaba ladep bad ngam don eiei ong.”
“Mynta ka jingtohkit ka ladep bad lada kam dei satia kaba pynhun ïa u ruh kam mut ba u hap ban tip lut nadong shadong ïa ki kyndon tohkit (term of reference),” la kynthoh u James.
“Balei ym kdew naduh kaba sdang ïa ki kyndon tohkit (term of reference). Namarkata, nga thrai u (Dr. Mukul Sangma) dei ban pdiang ïa kaei kaba kaiphod tohkit ka la pynpaw namarba kan kynthoh pyrshah ïa ka kaiphod tohkit ka long thik kumba kynthoh pyrshah ïa u briew uba la shah bynshet ban khlieh ïa ka jingtohkit,” la ong shuh shuh u James Sanmga.
