Ki skul Balang ki shlem ka jingnang jingstad bad ka tip briew tip Blei: Vincent H.Pala

Nongstoiñ, Jymmang 27: Ka Joel Gatphoh Memorial Synod Higher Secondary School kaba don ha Nongkynjang West Khasi Hills, mynta ka sngi ka la rakhe ïa ka sngi ba kyrpang jong ki kmie ki kpa ryngkat ka tamasa jong ki jingshad bad jingrwai sur tynrai.
Ïa katei ka jingrakhe la pynlong ha phyllaw jong katei ka skul ha kaba la pynïaid da u Pastor P.B Kharbani u ba dei u Principal jong katei ka skul ha ryngkat ka jingïadon lang jong u Pastor B.S.Dkhar President ka Managing Committee bad ki dkhot jong ka, kiwei pat ki Pastor, ki Tymmen basan, ki nonghikai, ki kmie ki kpa, ki khynnah skul, ki paitbah na ki shnong ba marjan.
Ha kane ka jingrakhe ïa ka sngi ba kyrpang, na ka liang jong ka skul ka la khot ïa u Ma Vincent H.Pala M.P ka Shillong Parliamentary seat kum u kongsan, ha kaba u bah Gabriel Wahlang MDC ka Nongstoiñ Constituency u la wan ban synran lang kum u symbud kongsan.
Ha kane ka sngi la ioh ruh ka jingkren na u Pastor B.S.Dkhar, u Tymmen Basan S.Paliar bad hadien ka jingkren jong ki la ïoh ïa ki jingrwai bad jingshad tynrai na ki khynnah jong ka skul. Nalor kata la ïoh ïa ka jingkren na u bah Gabriel Wahlang, u ba la ong ba ka sngi ban kynmaw burom ïa ki kmie ki kpa ka dei kaba kordor haduh katta katta.
U la ong ruh ba ki kmie ki kpa wat hapdeng jong ka jingduk jingkyrduh bad ki jingeh ba bun jait ba ki ïakynduh ki len lade na ka bynta ki khun. U la ong ba ki khun ki dei ki pansngiat jong ki kmie ki kpa bad haba ki khun ki wan shakhmat ha ka jingpule, ki kmie ki kpa ki klet ïa ki jingshitom, ka thait ka jrem haba ki trei shitom ban pynnang pynstad ïa ki khun.
U Ma Pala haba kren kum u kongsan, u la ong ba ki skul ba la seng da ki kynhuh Balang Khristan ha kane ka jylla, ki la long shisha kum ki shlem kiba ai ïa ki jinghikai kiba kordor tam ïa ki khynnah skul, la ka long ha ka jingnang jingstad, ka burom ka akor, bad ka jingim tip briew tip Blei. U la ong ba ki skul ba la seng da ki Balang ki dei ruh ki skul ba ki khynnah pule ki wan shakhmat duh ha ki Exam bapher bapher.
U la ong ba haduh kine ki sngi ki kmie ki kpa ki kham ïabeh ban phah pule ïa ki khun ha ki skul ba la seng da ki Balang, la ki dei ha ki skul ba la seng da ka KJP Synod ne da ka Balang Katholik.
U la ong ruh ba ka jingrakhe jong ka Joel Gatphoh Memorial Synod Higher Secondary School ïa katei ka sngi kyrpang ryngkat ki jingrwai bad jingshad tynrai, ka la long shisha ka nuksa na ka bynta kiwei pat. U la ong ruh ba na ka bynta ban kyntiew shuh shuh ïa ka pule puthi ha katei ka thaiñ, un sa ai jingïarap na ka M.P.Skhim lada ka sorkar ka dang mang pisa biang, namar ha kine ki snem ba la dep ka sorkar kam shym la mang pisa shuh na ka bynta ki MP.
Hadien ba la pynkut ïa katei ka prokram u Ma Vincent Pala u la leit ban jurip ruh ïa ki jaka ha ka shnong Nongkhlaw, namar ha u snem ban wan ka jingïaseng Samla KJP Synod Sepngi kan long ha katei ka Balang. Ka jingpynkhreh jong ka Balang Presbyterian Nongkhlaw ban pdiang ïa katei ka Jingïaseng Samla KJP Synod Sepngi, ka la ïaid shait shait ha kine ki sngi bad ha katei ka jingleit jurip u Ma Pala, u la kular ban shimkhia bad ban ïarap katba lah na ka bynta ban pynbit pynbiang ïa ki jingdon kam na ka bynta katei ka jingïaseng.
La ïa don ryngkat bad leit synran ruh da u Pastor B.S Dkhar Executive Secretary Nongkhlaw Presbytery, Pastor GML Mawlot u ba peit ba khmih ïa ka Nongkhlaw Presbytery, ki nongkitkam jong ka Jingïaseng Samla Presbytery, I Tymmenbasan ka Balang Presbyterian Nongkhlaw bad u bah Gabriel Wahlang MDC ka Nongstoiñ Constituency.