Shillong, Naitung 17: U Nongïalam ka Khasi Students’ Union (KSU) u samla Lambokstarwell Marngar ha ka sngi Balang u la kynnoh ba ka jingpynslem ban buh ïa ki entry-exit point kumba la kdew hapoh ka aiñ Meghalaya Residents Safety and Security Act (MRSSA), 2016 ka dei tang ka jingïalehkai saiñ hima sima (“political games”).
“Ka don ka kam ïalehkai saiñ hima sima hapdeng ki kynrad nongthaw aiñ. Na ka daw ka jingmyntoi saiñ pyrthei jong ki, ki la ïalehkai bad ki mat ki jura jong ki paidbah bad ka jylla baroh kawei,” ong u samla Marngar haba ïakren bad ki lad pathai khubor ha ka sngi rakhe ïa ka lyngkhuh sngi khlad ba 189 snem u Syiem Tirot Sing Syiem ha nongbah mynta ka sngi.
U la ïathuh ba ha ka jingshisha ka sorkar ka la dep ban ithuh ïa 18 tylli ki jaka ban buh ïa ki entry-exit point ha u snem 2015-16 da kaba bynrap ba ki la don haduh 21-23 ki jaka hapoh ka thaiñ Garo Hills.
“La lai snem mynshwa, ka sorkar ka la pynpaw ba kan don ka jinglut kaba bun lada kitei ïa kine ki jaka na ka bynta ban buh ïa ki entry-exit point bad ong ba ki don kiba pyntip ba kan don ka jinglut kaba da ki klur, hynrei ngi la ai jingmut ïa ka sorkar ba kan ïaid da ka prefab structure. Ka sorkar ka la mynjur bad ka la pdiang ïa kane ka jingai jingmut bad ka la buh ïa ka entry point ha Umling kum kawei na ki pilot project hynrei ïa ka entry point ha Umling la iehnoh hadien ba la wan sar ka khlam covid 19,” ong u Marngar da kaba dawa ba ka sorkar kadei ban thaw mardor ïa ki entry-exit point kumba la kdew hapoh ka MRSSA.
U nongïalam ka ksu u la dawa ruh na sorkar ba kan long kaba shai halor ka inner line permit (ILP), ka jingkynthup ïa ka Ktien Khasi hapoh ka khyrnit kaba 8 jong ka ri India bad kiwei pat ki mat.
U la ong ba ka sorkar kadei ban pynshai ruh halor ki jingeh ba ka sorkar pdeng halor ka Meghalaya Residents Safety and Security (Amendment) Bill, 2020, kaba la shah pynphai dang shen.
“Ngi dang hap ban shai halor kane ka kam. Namar kata ngi dawa ïa ka sorkar ba ka dei ban pynshai halor ka rai jong ka MRSSA,” u la ong.
“Kumjuh dei ruh ban ïathuh ïa ngi kaei kaba ka sorkar pdeng ka ïeng halor ka ILP. Lada ka sorkar pdeng ka dang pynslem bad shim ïa ka por ban khmih bniah ïa ka rai ba la mynjur da ka State Assembly, ngan ong ïa ki, phi dang shim ïa ka por hynrei ngin ïaibteng ban leh ïa ka bynta la jong ban ïada ïa ki trai ri trai muluk,” ong u Bah Marngar.
