Mairang, Naitung 17: Kan long ka histori ban sah jingkynmaw hadien 189 snem ka jingïap noh jong u Tirot Sing Syiem, u Syiem ka Hima Nongkhlaw, ha ka sngi Balang la plie ïa ka iingsah nam lane ka Tirot Sing Syiem Museum and Cultural Centre of Indigenous Knowledge ïa kaba la tei da ka tnad Arts and Culture ka Sorkar Meghalaya.
Ïa kane ka iingsah nam jong u Paiem Tirot Sing Syiem, la ban plie paidbah da u Myntri ka tnad Arts and Culture Bah Paul Lyngdoh uba la long kum u kongsan, ha ka jingïadonlang u MLA ka Mairang u Bah Metbah Lyngdoh uba dei ruh u Chairman jong ka Meghalaya State Planning Board, u Principal Secretary jong ka tnad Arts & Culture u Bah FR Kharkongngor, u Secretary jong ka tnad Arts & Culture u Bah FM Dopth, u Director ka tnad Arts & Culture u D.D Shira, Syiem jong ka Hima Nongkhlaw u Paiem P.M Syiemlieh, u Sordar ka Shnong Nongkhlaw Bah Kitbok War bad kiwei kiwei ki ophisar bad ki Myntri ka Hima Nongkhlaw.
Lah ban kdew, ïa ka iingsah nam jong u Syiem Tirot Sing, la tei da ka tnad Arts & Culture ha ka jinglut kaba la kot kumba 2.5 klur ïa kaba la mang pisa da ka tnad Tribal Affairs ka Sorkar Pdeng naduh ki snem ba dang long Myntri Rangbah u Dr. Mukul Sangma. Namar ki jingeh ha kiba bun ki liang kumta ym shym la lah ban pyndep ïa kane ka iingsahnam, hynrei dei ha kane ka lyngkhuh sngi ïap kaba 189 snem jong u Paiem ka Hima Nongkhlaw, la lah ban plie paidbah noh ïa ka.
Kumba la sakhi, hapoh kane ka iingsahnam ki don shibun ki khanapateng, ki tiar siat, ki tiar sahnam ba la pyndonkam da u Paiem Tirot Sing ha ka jingïakhun thma pyrshah ïa ki Shipai Phareng bad kiwei ki khana shaphang ka Hima Nongkhlaw kaba dei ka Hima kaba la bna nam hapoh ka jylla Meghalaya naduh ka jingthmu synshar jubor ki shipai Bilat naduh ba la thmu ban shna ïa ka surok na Sylhet sha Dhaka.
La ïoh jingtip ruh, ba lyngba kane ka iingsahnam kan long ruh kum ka lad ban tip ïa ka khana pateng la pateng bad ba ki nongwad bniah (Researchers/Scholars) kin ïoh ïa ka jingtip kaba bniah.
