ïalam u Conrad ïa ki nongrep bad nongsengkam lajong ban jngoh ïa ka Rashtrapati Bhavan

New Delhi, Naitung 17: U Myntri Rangbah ka jylla u Conrad K. Sangma, u la leit jngoh ïa ka Rashtrapati Bhavan ha ryngkat lang bad ki nongrep bad kiba sengkam lajong jong ka jylla kiba la ïashim bynta ha ka 2nd Meghalaya Pineapple Festival, 2024, kaba la long ha Dilli Haat, New Delhi. Kane ka jingleit jngoh ka long shi bynta na ka jingtreikam ka sorkar ban pynneh pynsah bad ban kyntiew ïa ka ïoh ka kot ki nongrep ka jylla.
Ha kane ka jingleit jngoh u la ïalam lang ïa kumba 19 ngut ki nongrep bad 10 ngut kiba sengkam la jong jong ka Meghalaya, haryngkat lang ka jingdon u Bah CVD Diengdoh, IAS Secretary, Planning Department, Government of Meghalaya, Kong I Majaw, Joint Secretary, Dept of Power, u Bah Alexander Mukhim, Deputy Secretary, ka kong Anita Kharpor, Joint Secretary, bad kong I Diengdoh, Joint Mission Director, SRES.
La ong ba da ki rukom treikam ka jylla la lah ban ai jingmyntoi ïa ki nongrep bad kiba seng kam la jong ha kylleng ka jylla bad da ka jingpynlong ïa ka 2nd Meghalaya Pineapple Festival 2024, kane ka jingleit jngoh ïa ka Rashtrapati Bhawan ka long kum shi bynta ban pynpaw ïa ka jingkwah ka sorkar ban kyntiew ïa ka ïoh ka kot jong ka jylla.
U Myntri Rangbah u la ong ba ka sorkar jylla ka kwah barabor ban ïatreilang bad ki nongrep kiba dei ka bynta kaba khraw ha ka ïoh ka kot jong ka jylla.
Lah ban ong ba ki nongrep ki la leit jngoh ruh ïa ka ‘Janjatiya Darpan’, ka tribal art bad culture gallery kaba don ha Rashtrapati Bhawan, ba la plie da ka Hon’ble President ka India ka Droupadi Murmu, kaba ïalade ka dei na ka jaitbynriew riewlum. Na ka liang kitei kiba la ïoh ka lad ban leit jngoh ki la pynpaw ïa ka jingsngewphylla ban ïohi ïa ki jingdeng ryndang jong ki Khasi bad Garo Hills jong ka Meghalaya ba la buh ha katei ka jaka.
“Ka Meghalaya Pineapple Festival ka la plie sa kawei ka kam na ka bynta jong ngi bad kane ka jingïoh ban jngoh ïa ka Rashtrapati Bhawan ka la pynurlong ïa ka jingphoh sniew jong ngi. U Myntri Rangbah ka jylla u ju kyrshan bha ïa ngi ki nongrep,” ong ka samla Badashisha Lapang, kaba dei kawei na ki nongrep ka jylla.
Katba u Bah Cyril V. D. Diengdoh, IAS Secretary, Planning Department, u la pynpaw ba ka Meghalaya kadei kawei na ki jylla kaba kwah ban kyntiew ïa ki kam rep. U la ong ba ka jingpynlong ka jylla ïa ka tamasa Sohtrun ka la long kawei na ki jingthmu ka sorkar ban kyntiew ïa ka rep ka riang. Dangshen ka jylla ka la shalan kumba 3.5 Ton u Sohtrun sha ka Middle East, ha kaba kane ka la long ka jingjop jong ka jylla. Kine ki kam ki la ïaid lang bad ka PRIME Meghalaya, kaba thmu ban kyntiew ïa kiba sengkam hapoh ka jylla.