Nongstoiñ, Jymmang 27: Ka FKJGP West Khasi Hills District ka la pynkynmaw bïang ban dawa na ka sorkar ïa ki mat kiba kum ka seng ka la ju dawa man la ka por. Hooid na ka liang ka CEC jong ka seng ka sngew ban ai khublei ïa ka sorkar ba ka lah pynurlong ïa ka GNM Nursing school ha Nongstoiñ, ha kaba ka lah buh memorandum lah ar sien hakhmat u myntri rangbah ka jylla u Conrad sangma, hynrei ka ïai pynkynmaw bad dawa ruh ba in plie noh sa ïa ka Blood Bank ha Civil Hospital Nongstoiñ.
Ka seng ka pynpaw ruh ïa ka jingsngewnguh ïa ka sorkar ba ka lah pyntrei ïa ka surok na Riangdo sha Athiabari bad ruh ïa ka surok na Nongstoiñ sha Rambrai. Hynrei ki dang don pat ki development ba kane ka sorkar ka hap ban leh bad pyndep kum ka ban pyndep noh ïa ka District Jail, ban sdang noh ïa ka surok na Nongstoiñ sha Maweit bad haduh Nonghyllam Nongjri.
Ha ka CEC ba la shong hynne ka sngi, ka lah buh ruh ka jingdawa ba ka sorkar kan shimkhia ïa ka thaiñ border, ban pynkhlaiñ ïa ki bor pahara ha lynter ki border. Ban kyntiew noh ïa ki border outpost kiba ha Langpih bad Kyrshai sha ki permanent police out post bad ruh ba kan phai khmat sha ka development ïa ki ophis sorkar kiba don ha khappud kum ki PHC, Veterinary bad ki sub centre.
Ka seng ka la rai ban ïai buddien ïa kine ki issue kiba ka lah sdang naduh ki snem ba lah leit. Kane ka long katkum ka kyrwoh ba la phah da u Information Secretary FKJGP West Khasi Hills District bah Pynshai Kharbani.
