Nongstoiñ, Jymmang 27: Ka Don Bosco Lakeshore School Banglapluh kaba don ha ka thaiñ Mawshynrut West Khasi Hills District, kum shi bynta ban pynproh shuh shuh ïa ki jingmut jingpyrkhat jong ki khynnah skul, hynne ka sngi ka la plie paidbah ïa kawei na ki tnad ai jinghikai kaba khampher ïa ki khynnah katei ka skul ïa kaba la tip kum ki Clubs.
Ïa katei ka jingïalang la wan ban plie paidbah da u bah Gigur Myrthong MLA/MDC ka Mawshynrut konstitwensi, ha ryngkat ka jingïadonlang u Principal jong katei ka skul u Phadar Sebastian Tirkey SBD, u Phadar Pyndeilang Khongkhiad Vice Principal, u Brodar Reynold Kurbah Headmaster bad kiwei kiwei.
Kitei ki club ki don haduh 6 jait ha la kajong ka jong ka kynhun kaba kynthup ïa ka Students Council, Dance Club, English Club, Science Club, Art and Craft club bad ka Scouts and Guide club. La ong ba lyngba kitei ki club kan long ka kabu ïa ki kynnnah kiba don sap bapher bapher.
Lada dei ha ki jingshad yn hikai ban pyntbit shuh shuh, ïa ki khynnah ba nang ban shna jingshna yn hikai ban pyntbit shuh shuh bad kumta ter ter, ha la ki sap ki phong kaba ki khynnah skul ki don. Yn pynsan pynheh ïa ki ha kitei ki sap bapher bapher, khnang ba kan long ruh kum kawei na ki lad kamai ha ka ïoh ka kot jong ki khynnah ynda ki la jam sha ka jinglong rangbah.
Ha kane ka sngi, ki khynnah skul jong katei ka skul ki la pynshit pynshngaiñ shuh shuh ïa katei ka jingïalang paidbah da ki jingrwai jingshad bad ki jingriam bapher bapher ha ka jingïalang ha Don Bosco Hall Christ King Riangdo.
