Byrngem ka ACC ban ujor sha ki bor ka aiñ halor ka jingpyndam ïa ka Smart Road Project ha Lachumiere

Shillong, Naitung 16 : U Bah Banshai Marbaniang lem bad U Bah Curchill Syiemlieh kiba long ki nongïalam ka Awaken Concerned Citizens (ACC) jongka Jylla hadien ba la ïohi ïa ka jubab lyngba I Bah Sniawbhalang Dhar iba long kum u Dy. Chief Minister bad Urban Minister jongka Sorkar Jylla , kin leit pan jingpynshai halor ka jingrai ban pyndam noh ïa kajingpyntreikam ïa ka smart road project ha Lachumiere hadien ba la shem ba kam long kaba lah ban trei pyndep.
Naduh kaba sdang ha ka 6 tarik jong u Bnai Iaiong (April) na ka liang jong u Bah Banshai Marbaniang u la pan shisyndon da ka jubab lyngba ka RTI act 2005 napoh ka tnat treikam jongka Sorkar Jylla kaba la tip kum ka PWD (Roads) ha kaba ïadei bad ka jingpyntreikam ïa ka Surok na shadien jongka MPSC Building bad ka All Saints School kaba don hapoh Lower Lachumiere naka bynta ban ïoh ïa ka jingshai kaba pura ha kaba ïadei bad katei ka kam kaba la wanrah ïa ka jingeh jongkiba bun ki Paidbah kiba ïaid ba ïeng manla ka sngi napoh katei ka
Surok kaba ym lah pyndep haduh kine ki sngi kiba mynta. Kane ka la shimpor khlem da lah ban ïoh ïaka jubab kumba la buh katkum ka kyndon jong ka Section 7 sub-section (1) jongka RTI Act, 2005 bad la shimpor haduh Lai Bnai kynthih ban pynphai ïaka jubab ha ka 8 tarik u Bnai Naitung (July) lyngba u Dy. Chief Engineer jongka tnat PWD (Roads) jongka Sorkar Jylla.
Ynda hadien ba la ïoh ïaka jubab lyngba ka RTI Application ka bym pat da lah ban pynshai pura na ka liang jongka kynhun kala leit ban ïakynduh ïa u Dy. Chief Engineer jongka tnat PWD (Roads) ha ka 12 tarik u Bnai Naitung halor ka kyndon kaba dang hap ban buh shisyndon ban pan da ka pisa na u nongpan RTI ha kaban ïoh ïa ka jubab kaba pura.
Na ka liang jong u Dy. CE PWD ( Roads) u la pdiang ïa kane ban pynbeit thymmai hynrei kaba pynlyngngoh tang hapdeng ki khyndiat kynta la ïohi noh ïaka jubab lyngba I Bah Sniawbhalang Dhar iba long kum u Dy. Chief Minister bad Urban Minister jongka Sorkar Jylla ba la pynsangeh noh ïaka Smart Road Project hapoh Lower Lachumiere da kaba yn wanrah thymmai da kawei. I Bah Sniawbhalang Dhar iba long kum u Dy. Chief Minister bad Urban Minister jongka Sorkar Jylla I la pynsngew lyngba ki News Media ba la pynkhreh ïa ka State Plan kaba thymmai na ka bynta baroh ki surok kiba don hapoh ka Nongbah Shillong ha ka jaka jong ka smart road project kaba la pyndam. I la
ong ba ka smart city project kaba la pyntrei hapoh ka thaiñ Lachumiere ka long kawei napdeng ki 17 tylli ki Smart City project ba la pyntreikam ha ka jylla bad I la shim ruh ïa ka rai ban pyndam noh shisyndon khlem da pynshai pat halor ka jingeh kaba la wanrah lyngba katei ka surok kaba la pynshlei ïa ka Um hapdeng u Slap bah uba la wanhap hapdeng ki khyndiat sngi kiba la leit.
Na ka liang jong I Bah Banshai Marbaniang I la ong ba yn hap ban leit ïakynduh ïa I Bah Sniawbhalang Dhar iba long kum u Dy. Chief Minister bad Urban Minister jongka Sorkar Jylla halor ki rai kiba la shim na ka liang jong I ha kine ki sngi kumba la sakhi ha kaba I la ong ruh ba in pyrshang ban khmih bniah ïa baroh ki surok hapoh ka Nongbah Shillong ki ba dei ban pyndep pura khlem da sahteng shuh lyngba kata ka state plan kaba thymmai ka ban ïaid lyngba ka tnat treikam jong ka PWD (Roads) jong ka Jylla. I Bah Banshai Marbaniang ha ryngkat lang bad ka kynhun I la sah hapdeng ka jinglyngngoh ruh ban ïohi hapoh ka jubab RTI ba ka jingmang tyngka kaba la poi kumba 87 klur 18 lak tyngka ban pyntrei ïaka surok lyngba ka Smart City project kaba la pynsngeh noh kynsan da kaba yn wanrah da ka new plan project. Lada ka pisa ka dei kaba la pynlut katkum ba la ïoh jubab lyngba ka RTI naka liang jong ka kynhun kan hap ban ïaid shalor katkum ki kyndon jongka Aiñ ne haduh u pud jongka Public Interest Litigation (PIL) halor ka jingbymlah ban pyndep ïa ki kam lyngba ka Sorkar Jylla kaba hap ban ïaid lait ruh lada phai halor ki kyndon jongka Riti Synshar Paidbah jongka Ri India kaba la tip kum ka Indian Constitution.