Shillong, Naitung 15: Lai tylli ki kynhun ba kynthup ïa ka Lummawbah SC, Diengpasoh SC bad ka Nongthymmai Nongkynrih SC ki la khur jingjop ha ki jingïalehkai ka lympung Shillong Sports Association Fourth Division 2024 kiba la long hynne ka Lah Sngi U Blei ha Polo.
Haba phai sha ka jingïalehkai kaba nyngkong, kaba la long ha SSA Ground, la sakhi ïa ka Lummawbah SC kaba la pynliem noh ïa ka Mawphlang SC da 2-1 kol.
Ka Lummawbah ka la pynkyndit ïa ka liang pyrshah da kaba pynkhihjar tang hadien 1 minit ba la ïaid ka por lyngba u Andraw Maring. Hynrei u Iaidonkupar Kurbah (41 min) u la pynïakhaid na bynta ka Mawphlang.
Related Posts
Ka Lummawbah ka la pynthikna ban khur shalade ïa ki lai point ba kongsan dei lyngba ka kol na u Rickymond Muktieh kaba la wan ha ka 65 minit.
Ka jingïalehkai kaba bud la sakhi ïa ka Diengpasoh SC kaba la jop salit da tang 1 kol ïa ka Pommura SC. ïa kane ka shi kol la thep da u Banpynkmen Kharsati- Kharsati (49min).
Haba phai sha ka jingïakhun kaba long ha MFA Ground, ka Nongthymmai Nongkynrih ka la pynliem noh ïa ka Madan S&CC da 2-1 kol ban khur ïa ki lai point.
Ha ka jingïalehkai, dei ka Madan S&CC kaba la pynkhihjar nyngkong lyngba u Wankmen Lyngdoh (4 min) hynrei ka Nongthymmai ka la pynïakhaid lyngba u Arman Chettri (9 min) shuwa ba u Iashanskhem Marbaniang (49 min) un pynkhih ïa ka kol pynjop.
Mynta ka sngi kin don lai tylli ki jingïalehkai, kaba nyngkong ha ka por 11:30 baje mynsngi ha SSA Ground, hapdeng ka Madanryting SC pyrshah ïa ka Lumpyngngad SC, nangta por 1:45 baje mynsngi, ka Raitsamthiah SC pyrshah ïa ka Lumkseh SC, bad kaba khadduh ha ka por 4 baje nohphaisngi, hapdeng ka Nongkohlew SC pyrshah ïa ka Laitumkhrah SC.