Shillong, Naitung 15: Ha kane ka samoi lehkai 2024-25 ka lympung I-League 3 jong ka All India Football Federation, kaba dei ka lympung kyrdan ba saw jong ka ri, la sakhi ba kin nym don satia ki klob jong ka jylla Meghalaya ki ban ïashimbynta kumba la paw ha ka thup kynhun ba la pynbna.
Ha kane ka kynti, kin don arphew tylli ki kynhun ki ban ïashim bynta ha kane ka lympung mynta u snem, kaba dei ruh ka sien pynlong ba ar.
Ki kynhun ki ban ïashimbynta ha kane ka lympung ki kynthup ïa ki lahduh jong ka State league jong ki jylla bapher bapher.
Ha u snem ba ladep, ka Rangdajied United FC ka la leit ban ïashimbynta hadien ba long lahduh jong ka Meghalaya State League 2023. Hynrei kam shym la lah ban ïaid jngai ïa ka group stage, watla kata ruh, ka la ;pyndep ha ka kyrdan ba ar na ka Group C.
Related Posts
Ka jingbym don ki klob ka jylla ban ïashimbynta mynta u snem ha ka I-League 3, ka dei namar ba ym shym la ïoh ban pynlong satia ïa ka MSL, kaba mut ba ka tarik ban ïohrung sha kane ka lympung ka la ïaid shakhmat bad ka Meghalaya kam shym la ïoh ïa ka kynhun ban phah leit mihkhmat mynta u snem.
Nalor ki lahduh jong ka State league bapher bapher, mynta ka samoi kane ka lympung I-League 3 ka kynthup ruh ïa ka Maharashtra Oranje FCbad ka Kenkre FC, baroh kiba la shah sloit noh na ka I-League 2 ha ka samoi 2023-24, katba ka KLASA bad ka Kerala United FC ki la ïohrung lyngba ka playoffs.
KI kynhun ban ïakhun ha ka I-League 3 mynta ka samoi 2024-25 ki long:
KLASA FC (Manipur), Kerala United FC (Kerala), Karbi Anglong Morning Star FC (Assam), Garhwal FC (Delhi), Charutar Vidya Mandal FC (Gujarat), Sesa Football Academy (Goa), Bhuna FC (Haryana), Diamond Harbour (West Bengal), HAL SC (Karnataka), Sports Academy Tirur (Kerala), Lake City FC (Madhya Pradesh), Chanmari FC (Mizoram), Sports Odisha (Odisha), Young FC (Punjab), Jaipur Elite FC (Rajasthan), Ghaziabad City FC (Uttar Pradesh), MYJ-GMSC (Maharashtra), RKM Football Academy (Chhattisgarh), Maharashtra Oranje FC (Maharashtra), Kenkre FC (Maharashtra).