Shillong, Naitung, 14: U Angshuman Dey, Joint-Secretary, Ministry of D.O.N.E.R; Secretary, North Eastern Council (NEC) uba dei ruh u Central Nodal Officer, ka Jal Shakti Abhiyan na ka bynta ka East Khasi Hills District ha ka sngi Palei u la khmih ïa ki rukom pyntreikam jong ka Jal Shakti Abhiyan-Catch ka prokram ba ïadei bad u slap ne Rain Program jong ka sorkar pdeng ha Office jong ka Deputy Commissioner, East Khasi Hills District.
Ka Ministry jong ka Jal Shakti ka la pyllait paidbah ïa ka Jal Shakti Abhiyan (JSA) ha u snem 2019 ha ki 1,592 tylli ki block na ki 2,836 ki block ha ki 256 tylli ki water stressed district jong ka ri. Ha u snem 2021, “Jal Shakti Abhiyan: Catch the Rain” (JSA: CTR) kaba la buh ïa ka phang “Catch the Rain – Where it Falls When it
Falls” la pynlait paidbah da u Myntri Rangbah duh ka ri kaba kynthup ïa ka jingïalap Catch the Rain (CTR) ban ïoh bynta da baroh ki block jong baroh ki district ba kynthup kiba ha nongkyndong bad Sor ha kylleng ka ri.
Ka jingpyntreikam ïa ka JSA-CTR ka la sdang ruh ha u snem 2019. Hynrei namar ka jingwan ka khlam COVID-19 ka jingpyntreikam ïa kane ka la ïaid suki. Ha ka shisnem ba la leit, bun ki jaitkam bad ki jingtuklar ki la shim la ka bynta hapoh ka East Khasi Hills District ha kaba kane ka distrik ka la paw ha kane ka jylla. Kane ka District ka la lah ban map, ban shna bad geotagged kumba 3526 ki water body bad ki jingtei ha ka District, kum ki jaka pynlang um, ki jaka pynlang umslap, ka jingpynthymmai ïa ki traditional water body, ka jingtei ïa ki recharge structure, ki water shed development, ki spring shed development, ki jingthung dieng bad kiwei kiwei.
U Angshuman Dey, Joint-Secretary, Ministry of D.O.N.E.R & Secretary, North Eastern Council (NEC) u la ïaroh ïa ki kam ba la leh da ka District. U la ong ba ki dang don ki jaka ba kane ka district bad ki Block ki lah ban pynbha da ka jingïashim bynta lang jong ki longkmie kum shi bynta jong ka Nari Shakti sha ka Jal Shakti Campaign, ka jingïashim bynta bad jingïoh jingshaniah na ki nongïalam shnong bad kiwei ki prokram. U la pynshlur ïa ka District ban long shitrhem bad wanrah thymmai ïa ki prokram ka Jal Shakti Kendra ban long kum ka lad ai jingpyntip na ka bynta ki nongshong shnong halor ka jingpyntreikam ïa ka Jal Shakti Abhiyan.
Ha ka jingïalang u S Warjri, MCS, ADC ha ka jaka jong ka Deputy Commissioner u la batai bniah halor ki kam ba la shim da ka District lyngba jong baroh ki Water related Line Department. Ha ka jingïalang la shimbynta da u Dhrubajyoti Khanikar, Scientist D, Central Ground Water Board kum u Technical Officer bad kiwei kiwei.
