Shillong, Naitung, 13: Ka Dorbar Lyiur jong ka KHADC ha ka sngi Balang ka la kynmaw burom ïa ki lai ngut ki MDC barim kiba la khlad noh na kane ka pyrthei dang shen mynta u snem. Ka Council ka phah ruh ïa ka jingsngewlem sha ki bahaiing ha sem, sha ka kurim bad ki khun jong kine ki nongmihkhmat ba la khlad noh.
Kine ki lai ngut ki kynthup ïa u (L) Bah Raisen Mawsor uba la khlad noh ha ka 16tarik Jymmang, 2024. Une u rangbah udei uba u Nominated MDC naduh ka snem 1958 – 1967. U la shah jied kum u MDC ha ka snem 1967 na Nongstoin Constituency bad ruh kum u MLA ha ka snem 1972 na Mawthengkut constituency. La ong ruh ba dei ha u snem 1979 u la shah jied biang kum u MDC na Mawthengkut constituency.
Ka Council ka kynmaw burom ruh ïa u MDC barim ka Mylliem, (L) Bah Sounder Strong Cajee uba la khlad noh ha ka 09tarik Jylliew, 2024. Une u rangbah u la mihkhmat ïa ka Mylliem constituency naduh ka snem 1999 – 2004.
Ha kajuh ka por ka Council ka kynmaw burom bad phah ka jingsngewlem halor ka jingkhlad noh u MDC ka Shella ba dei ruh u CEM barim ka Council Bah Teinwell Dkhar uba la khlad noh ha ka 26tarik Jylliew, 2024. Une u rangbah u la jop lynter haduh saw sien na Shella constituency kata naduh u snem 2004 tad haduh ki sngi ba khatduh jong u.
Kum u MDC u Bah Teinwell u la bat bun ki kam la ka long kum u EM ha u snem 2009, Nongïalam ka Liang Pyrshah naduh 7-08-2009 haduh 1-09-2010, Deputy Chief Executive Member ha u 2014, kum u Chairman naduh 24-7-2018 -5-3-2019 bad kum u CEM pat naduh ka 7-3-2019 – 20-11-2019.
