Shillong, Naitung, 13: U Myntri Rangbah ka jylla u Conrad K Sangma, u la ïashim bynta ha ka Impact Week 2024 kaba la long ha Martin Luther Christian University. Ïa ka prokram la pynlong da ka Prime Meghalaya ha ka jingïatreilang bad ka MLCU ban ai lad ïa ki samla ban jied ïa ki jingsengkam lajong kaba dei ka thong ha ka jingim jong ki. La donlang u Commissioner & Secretary, Education, u Vijay Mantri ha kane ka prokram.
Haba kren ha ka jingïalang ban ai mynsiem ïa ki samla ban seng kam la jong na ki college bapher bapher ka Nongbah, u Myntri Rangbah u Conrad K Sangma, u la pynkynmaw ïa ki sngi jong u kum uwei na ki nongsengkam lajong ha shwa ba un rung hapoh ka jylli jong ka saiñ hima sima da kaba ong ba haba long kum u nongsengkam ha kito ki sngi ka la ktah ïa u ha kata ka rukom kaba bha, da kaba bynrap, “Namar kata haba ngi wan ha ka sorkar nga long uba shai ha ka jingmut ba ngin thaw ïa ka ecosystem na ka bynta kiba sengkam la jong kaba ngam shym la ïoh lad ha ki por jong nga.”
U Myntri Rangbah u la pynpaw ruh ïa ki katto katne ki prokram jong ka sorkar jylla na ka bynta kiba sengkam lajong kum ka Prime Meghalaya, CM Elevate, Chief Minister’s E Championship bad kiwei da kaba kyntu ïa kiba ïashim bynta ban shim kabu ïa kine ki prokram.
U la ïaroh ïa ki presentation bapher bapher ha kane ka prokram bad u la ong, “Phi la pyni ïa ka kyrdan kaba khraw ha ka jingshaniah bad ka lynti ba phi la shim halor ki jingeh ka rep ka riang, ka kam jngohkai, ka rukom pynïaid ïa ki kam kum ka jinglum ïa ki jaboh jabaiñ, ka kit ka bah bad ki jingpynïasoh kiba dei ki bynta kiba kongsan bha na ka bynta kiba sengkam lajong.”
U la ong ba ka jingkylla ha ka rukom pyrkhat pyrdaiñ ka long kaba donkam naba dei ban ïohi ia ki kam ym kum ki jingeh hynrei kum ki jingplie lad naba kadei hangne ba ki sienjam kiba sengkam lajong ki dei ban shim ki rai kiba long katkum ki jingleh kiba pynsuk bad kiba biang ha ki jingïarap pisa.
Ka Prime Meghalaya ha ka jingsdang ban kyntiew ïa ki jingsengkam lajong jong ki samla ka la bei pisa bad kyrshan ïa 15 tylli ki jaka pule ha kylleng ka jylla ba kin pynlong ïa ki Entrepreneurship Development Programs bad ki nongsengkam kiba pynmih ïa ki kam bad kiwei.
