Ka Sorkar ka dei ban sei madan ïa kaiphod jingtohkit, ong ka Sur ki Nong Mawlai

Shillong, Jymmang, 26: Ka kynhun, Ka Sur ki Nong Mawlai kaba kynthup lai tylli ki Sengbhalang ha ka shnong Mawlai, ka KSU, FKJGP, HNYF, ki la dawa ïa ka Sorkar Meghalaya Democratic Alliance (MDA) ban sei madan ïa ka kaiphod tohkit ba la aiti da u Nongbishar ba la shongthait sha ka Sorkar dang shen.
“Ngi, Ka Sur ki Nong Mawlai, ngi kwah ban pynpaw ïa ka jingsngewnguh ïa u Justice T.Vaiphei uba la lah ban aiti sha ka Sorkar Jylla ïa ka jingwad bniah jong u halor ka jingshah siat ïap jong u Bah Cheristerfield Thangkhiew ha ki riewthrang snam jong ka shnat treikam ki Pulit ha ka 13tarik, Nailar, 2021,” ong u kyrwoh na Ka Sur ki Nong Mawlai.
“Kaba shai hi ka long, ba ka dei ka kam thombor ka Tnat Pulit jong ka Jylla ba la poi shaduh u pud ban shah bthat jubor ka jingim jong u Bah Cheristerfied. Hadien ka jingbitar ki paidbah bad ki Sengbhalang ki la lah ban pynbor ïa ka Sorkar ban thung ïa ka Judicial Inquiry ba la khlieh da u Justice T. Vaiphei bad hadien khyndai bnai ka Judicial Inquiry ka la lah ban aiti ïa ka kaiphod tohkit sha ka Sorkar,” ong kane ka kynhun.
“Kaba pynlyngngoh ïa ngi kum ki Sengbhalang bad ruh ïa ki paidbah hi ka long ba ka Sorkar mynta lah jan shitaiew kam pat leh eiei halor ka jinglap jong ka jingtohkit. Kum ki Seng, ngi pynrem jur ïa kane ka jingsngap jar jong ka Sorkar bad ka jingbym leh eiei halor kane ka kaiphod. Ngi pynrem jur ruh ïa ka jing bym kloi jong ka Sorkar ban pyntip paidbah aïu ka don ha ka kaiphod tohkit. Ka jingbym lah ne bym nud jong ka Sorkar ban pyntip paidbah ïa ki jingshem ha kane ka kaiphod ka dei namarba ka Sorkar ka la bakla ban bthah kam ïa ka tnat Pulit bad ka kwah ban ïada ïa ki riewthrang snam kiba don ha tnat Pulit. Ka jingbym lah jong ka Sorkar ban sei madan ïa ki jinglap jong kane ka kaiphod ka long pyrshah ïa ka synshar paidbah namarba dei u paidbah uba pynbor ïa ka Sorkar ban buh da ka Judicial Inquiry, lada ka Sorkar kam sei madan ïa kane ka kaiphod ka dei ka jingber mluh ha ki jingmong jong kiba bun balang kynthup ïa ki Sengbhalang bad ka dei ka jingkheiñ dewthala ïa ka synshar paidbah. Lyngba kane ka kaiphod kum ki paidbah kin sngewthuh ba haduh katno ki lah ban shaniah ïa la ka jingim ha ki bor Sorkar,” la dawa ka kynhun.
“Kumta kum ki seng, ngi dawa ba ka Sorkar ka dei ban pynbna paidbah ïa kane ka kaphod hapoh shitaiew hynrei lum kumta ngim banse ban shim da kiwei pat ki lad ki lynti ban pynbor ïa ka Sorkar ba kan leh la ka kamram,” la maham kane ka kynhun.