Shillong, Naitung 07 : U Bah PT Sawkmie, MLA barim u ong ba donkam ka jingïatrei lang hapdeng u myntri rangbah ka jylla, u Conrad Konkal Sangma, ki arngut MP, uba na Shillong bad na Tura bad kine kin lah ban pynurlong ïa ka Inner Line Permit (ILP) bad ban pynrung ïa ka ktien Khasi bad Garo ha ka khyrnit baphra jong ka constitution ka ri India.
“Ngim dei ban klet ba ka resolution ba la pass da ka state assembly jong ngi bad ki hynriew phew ngut ki MLA ban dawa na ka sorkar India ban pyntreikam noh ïa ka ILP bad ha kajuh ka por ban ithuh noh ïa ka ktien Khasi bad Garo ban pynrung noh hapoh ka riti synshar ka ri India,” ong u Bah Sawkmie ha ka jingiakren bad ki lad pathai khubor.
U bynrap, “Ki sengbhalang kum ka Khasi Students Union bad baroh ki sengbhalang ha ka jylla da kawei ka sur ki dawa ba ngi donkam ïa ka ILP, hynrei ka sorkar India ka leh mynthi ka set kyllut beit ki shkor.”
Ka por ka la poi ba ka sorkar ka dei ban shimkhia biang ïa kane ka issue, kumba ka la shimkhia ha ki San snem mynshwa, pynkut u bah Sawkmie.
