Shillong, Naitung 08 : U Myntri Khynnah ka tnad Minority Affairs ka sorkar pdeng, u George Kurian ha ka sngi Nyngkong ha ka jingwan jong u sha Shillong u la kiar ban jubab halor ka jingkylli ba lano u Myntri Rangbahduh ka Ri u Narenda Modi un leit jngoh ïa ka Manipur ka jylla kaba don hapdeng ka jingkynad kaba jur.
“Peit ha Parliament, u Myntri Rangbahduh ka Ri u la jubab halor kane ka jingkylli, kumta ngam kwah shuh ban ong ei ei nalor kata,” ong u Kurian haba kren bad ki lad pathai khubor hadien ka jingkynduh bad ki nongïalam ka BJP ha ophis treikam jong ka party ha Shillong.
Shuh shuh haba jubab halor ka jingkylli, u Myntri Khynnah u la ïai ban ba um kwah satia ban kren ei ei halor katei ka bynta namar ba u Myntri Rangbahduh u la dep ban pynshai ha Parliament.
Ha kajuh ka por u Kurian u la pynpaw ka jingkyrmen ba ka party BJP kan sa kiew ha Meghalaya kumba long ha kiwei pat ki jylla jong ka ri. Katkum ka jingong jong u, ha u snem 2017 ka party ha Tripura ka mad lang kumjuh kumba jia ha Meghalaya hynrei hadien ka jingkylla ka wan.
