Pyllait u Conrad ïa ka CM-Connect ka rynsan ban sngap ïa ki jingeh ki paidbah ha Adokgre

Shillong, Jylliew, 05: Kum shibynta ban pynkhlaiñ ïa ki kam synshar shnong bad ban pynthikna ïa ka jingïashim bynta ki nongshong shnong ha ki kam synshar shnong bad ka sorkar, u Myntri Rangbah ka jylla u la pyllait paidbah ïa ka CM-Connect “Public Forum” ne ka rynsan paidbah ha Adokgre ha North Garo Hills.
Kane ka CM-Connect Public Forum ka dei ka jingsdang kaba thymmai da ka sorkar ban pynpoi sha ki nongshong shnong ha ki shnong ki thaw, ban sngap ïa ki jingsngewkhia bad jingeh jong ki, bad ban pynïoh ïa ki lad jingïarap bad ki jingshim rai. Kane ka prokram la pynwandur ïa ka jingpynïasoh hapdeng ka sorkar bad ki nongshong shnong, da kaba pynthikna ba ki sur jong ki paidbah yn lah ban ïohsngew kynthup ruh ïa ki jingeh jong ki.
Ha kane ka jingplie, u Myntri Rangbah u la sngap bha ruh ïa ki jingujor jong ki paidbah, kaba dei naduh ka jingtei ïa ki jingkieng bad ki surok kiba slem ban pyndep ïa ki kam, ka jingslem ban pyllait ïa ki ram da ki bank, bad kiwei.
Haba kren ha ka jingïalang u la ong ba ka sorkar jong u kan shim khia ban pynpoi ki kam shakri sha ki paidbah.
U Myntri Rangbah u la pynbna ba kum kine ki prokram yn pynlong ha baroh ki 56 tylli ki block ka jylla ban ailad ïa ki paidbah ban aiti ïa ki jingkyrpad haba ïadei ka jingpyntrei ïa ki skhim bad kiwei ki program sorkar.
Ïa ka program la shim bynta da kiba bun ki MLA, kynthup ïa u Rupert Momin, Pongseng Marak, Sanjay Sangma, bad Ian Botham K. Sangma, bad kiwei kiwei.
Ha kane ka jingïakynduh ïa ki paidbah ka la don ka jingkylli halor ka jingtei ïa ka jingkieng kaba na Adokgre-Mangsang, kaba pynïasoh ïa ka North Garo Hills sha East Garo Hills. U Myntri Rangbah u la bthah ïa ki ophisar ban peit ïa kane ka jingeh ki nongshong shnong ha kaba ïa kane la jubab ruh da ki PWD Engineer.
Ki nongshong shnong ki la aiti ruh ka jingkyrpad sha u kaba kyrpad ban pynbha bad kyntiew kyrdan ïa ka Chenanggre Stadium ha Adokgre, ba kynthup ka jingtei ïa ka multi-facility center.