Nongstoiñ, Naitung 5: Ka shnong Riangdim ka dei ka shnong kaba jngai tang kumba 12 km ei ei na Shallang bad ka dei kaba dang hap hapoh u pud u sam jong ka Hima Nongstoiñ West Khasi Hills District.
Ha katei ka shnong don shibun ki jingmih kaba ai ja kpoh ïa ki paid nongshong shnong jong katei ka shnong kynthup ïa u sohphan, sohpieng, kwai tympew bad kiwei kiwei.
Hynrei, namar ka jingbym biang jong ka surok, la ong ba kitei ki mar ki nongkhaïi ki wan ban thied ha ka dor kaba tang 100 tyngka katba uta u juh u mar haba poi ha ïew Shallang u kot haduh 500 tyngka.
U bah S.Dkhar Secretary shnong Riangdim, u la ong ba ïa katei ka surok ha ka jingshisha la sdang ban pyntreikam lyngba ka scheme PMGSY da uwei u Contractor.
Hynrei naduh u snem 2014 haduh mynta um pat pyndep. Na ka liang jong ka thaiñ ryngkat bad u MLA barim ka Mawshynrut u bah Gigur Myrthong, ki la leit ruh ban ujor shaduh u Myntri Rangbah ka jylla Meghalaya u Conrad K.Sangma pyrshah ïa utei u contractor.
La ïohi ruh ba ha katei ka shnong wat haba la don ka jingkieng, phewse ki kali pat ki hap ban ïaid na rum jong ka jingkieng namar ka jingbym pat dep lut. Ki surok lei lei don shibun tang kiba sniew suda, namar la shu tep malu mala tang da ka khyndew bad la siang rong tang kumba shipawa ruh em.
U Probinus Rongrin nonghikai jong ka skul St Savio Secondary School Riangdim, u ba dei ruh u nongshong shnong jong katei ka shnong, u la ong namar ka jingbym biang jong ka surok, ki duh shibun ki jingdonkam bad ki sngewdiaw bad sngew lehraiñ ïa ki kmie ki kpa bad ki khynnah skul ruh kumjuh.
