Ka bhah ki Garo kaba 40% kam dei ban shah ktah kyntiew 48% is ki Khasi-Jaintia : AKAF ïa ka Expert Committee

Shillong, Naitung 02: Ka Seng All Khasi Hills Achik Federation (AKAF) ha ka sngi Ba-ar kala aiti ïa ki jingai jingmut sha ka Expert Committee on State Reservation Policy kaba kdew ïa ka jingdonkam ban pynthikna ba ka bhah ki Garo (40%) kam dei ban shah ktah satia.
Ha ka kyrwoh khubor u nongialam ka seng u Clivestar Ch Marak ha ka shithi sha ka Expert Committee u la ong, “Ngi kyrpad ïa ka Expert Committee ban pynneh kumjuh khlem da ktah ïa ka Job Reservation ki Garo, na ka bynta ka bha ka miat jong ki lai tylli ki paid riewlum ka Ri-lum Garo, Khasi bad Jaiñtia bad ruh na ka bynta ka bhah ka miat jong kiwei ki para riewlum bad ki nongshong shnong ka Jylla Meghalaya.”
Hynrei ula ong ba ka seng ka ai jingmut pat ïa ka jingdonkam ban pynkylla ïa ka 20% ka bhah basah jong ka Job Reservation Policy lada ka Committee ka dei ban ai jingmut ban pynkylla ïa ka Reservation Policy jong ka 12 tarik Kyllalyngkot, 1972.
“Ka Seng ka ai jingmut ba lada ka Committee ka pynleit jingmut ha ka jingkhmih biang ne pynkylla ïa ka Reservation Policy, ha ka jingsngew jong ngi la kyrpad rit ban pynkylla ïa ka 20% jong ka Job Reservation Policy kaba mang sha kiwei pat ki paid riewlum bad ka General category da kaba pynkiew sa 8% ïa ki paid Khasi bad Jaiñtia bad ban bhah noh tang 12% ïa ki General category bad kiwei ki paid riewlum,” ong u Marak.
“Haba kyrpad ban pynkiew 8% kata haduh 48% ka bhah ïa ki Khasi bad Jaiñtia, ka seng ka kyrpad ruh ban kynthup lang ïa ki paid Garo kiba sah ha kylleng ki bynta jong ka Ri-lum Khasi bad Jaiñtia kiba la shong shnong pura ha Ri-lum Khasi bad Jaiñtia,” ula bynrap.
U Marak ula ong ba ka daw bad nongrim ba dawa kynthup lang ïa ki paid Garo ba sah ha Khasi Hills ka dei, “Namar ka jingïaphiah pud, ki paid Garo basah ha Khasi Hills, watla ki paid Garo kila ïoh 40% ka bhah hynrei kane ka dei kaba la mang ïa ki Garo ba sah ha kylleng ki bynta ka Ri-lum Garo ym ïa ki Garo basah ha Ri-lum Khasi. Ki Garo kiba sah ha Ri-lum Khasi ki dang sahdien bha ha kiba bun ki bynta jong ka jingim bad ki Garo ba sah ha Ri-lum Garo ki dang sahdien bah haba phai sha ka pule ka dangle, ka rukom im bad ki dang sahdien bha ha ka ïoh ka kot”.