Shillong, Naitung 1 : Ka sorkar pdeng ka la mang 60 klur tyngka lyngba ka Prime Minister’s Development Initiative for North East Region (PM-DevINE) naka bynta ban tei ïa ka hospital ban ai jingsumar ïa ki mrad kaba long ka hospital mrad kaba nyngkong eh hapoh ka jylla Meghalaya. ïa kane ka hospital la rai ban tei ha 7 Mer Upper Shillong ha ka jingheh ka jaka ba 20 acre.
Haba ïakren bad ki lad pathai khubor u myntri ka tnad Veterinary u bah A.L Hek u la ïathuh , ïa kane ka jingtyrwa la mynjur da ka State Level Empower Committee jongka tnad Planning bad hadien ba la dep pynkhreh lut ïa ki kot ki sla un sa leit bud dien pat ïa ka kam sha Delhi ban ïoh noh ïa ka pisa kumba 32 klur ban sdang noh ïa ka jingtei.
Ka PM DevINE ka dei ka skhim jongka sorkar pdeng kaba kan ïarap pisa 100 % tang na ka sorkar pdeng beit. ïa kane ka skhim la sdang ha ka mang tyngka 2022-23 hadien ba la ai jingmynjur da ka kynhun myntri ka sorkar pdeng ha ka 12 tarik Risaw 2022. Ha kane ka skhim ka sorkar pdeng ka la mang haduh 6,600 klur tyngka na ka bynta u snem 2022-23 haduh 2025-26. Ka jingthmu jongka sorkar pdeng ka long beit ban kyntiew ïa kane ka thaiñ shatei lam mihngi ha baroh ki liang khamtam ha kaba shna ïa ki surok ki lynti ki syngkieng, ban tei ïa ki jingtei bad kiwei kiwei ki projek.
U bah Hek u la ïathuh “ Ka tnad Veterinary ka la don lypa ka jaka 400 acre ha 7 mer Upper Shillong bad na katei 20 acre yn ai sha kane ka hospital. Ka jingmang na ka bynta ban tei ïa ka hospital ka long 60 klur tyngka bad na ka bynta ka wat kaba nyngkong ne ban sdang noh ïa ka jingtei la dep mang lypa 32 klur”.
Ha kane ka hospital yn sumar ïa baroh ki jait mrad khamtam ki mrad ba ri hi da ki briew, ong u bah Hek.
“ Ka jingdon jong kane ka hospital kan long ka jingmyntoi kaba khraw ïa ki paid jongka jylla khamtam mynta kiba bun ki briew kiba ieit ïa ki mrad bad kiba ri hok bha ïa ki kum ki ksew bad ki miaw bad ki da kwah ban don ka hospital ban ïoh ai jingsumar bha ïa ki jingri jongki” ong u bah Hek.
