Shillong, Jymmang 25: U Myntri Rangbah ka Jylla hynne ka sngi balang ula ong ba lada ka Bharatiya Janata Party (BJP) kam kwah shuh ban kyrshan ïa ka sorkar Meghalaya Democratic Alliance (MDA), ai ba ka jingthoh kan wan na ka High Command na Delhi.
“Lada ka BJP-Meghalaya ka sngew ba ka kwah mih noh, ai ba ka High Command na Delhi kan phah da ka jing thoh ba kim kwah shuh ban don bad ka sorkar MDA” ong u Conrad haba ïakren bad ki lad pathai khubor.
U Conrad ula kynthoh ïa kane halor ka jingïaid ïalap jong ka BJP pyrshah ïa ki kam ka Sorkar lyngba ki rynsan jong ka Social Media.
Na ka liang ka BJP dang shen kala dawa ïa u Myntri Rangbah ka Jylla ban hiar shuki noh lada um aiti sha ka CBI ba kan tohkit halor ka jingkhyllem jong u dome ka Ïingdorbar Thaw Aiñ ba thymmai ka Jylla.
U Conrad ula ong “Katba ki Nongïalam jong ka BJP kim pat phah khubor ne ai jingthoh, kin don beit ki briew kiba kren, kin don shibun ki nongïalam kiban kren kynthup ki briew ki bym iadon bynta lang ha ka Sorkar” ula ong haba bynrap “Kine kiei kiei baroh ki don beit hynrei ngam tharai ba nga donkam ban kynthoh eiei halor ki jingkren jong kine ki riew shimet”.
